काठमाडौं । कवि एवं नेपाल प्रज्ञा प्रतिष्ठानका पूर्वकुलपति बैरागी काँइला (तिलविक्रम नेम्वाङ सुब्बा)ले लेखकहरूले पाउने पुरस्कार रकममा राज्यले कर लगाउन नहुने बताएका छन् ।
मंगलबार गोरखापत्र संस्थानले प्रकाशन हुने मधुपर्कको ५६औँ वार्षिकोत्सव कार्यक्रममा पूर्वकुलपति काँइलाले लेखकले लेख लेखेर पाउने पारिश्रमिक र लेखेर योगदान दिएबापत पाउने सम्मानको रकम र पुरस्कारमा भिन्नता रहेको बताए ।
उनले पुरस्कारमा कर लगाउनु उचित नभएको तर्क गरे । उनले लेखकले ५० वर्षपछि एकपटक पाउने पुरस्कारमा आयकर काटेर पुरुस्कार दिन नहुने बताए ।
सरकारले आयकर लगाउने नियमित आम्दानीमा भएको भन्दै पुरस्कारमा कर लगाउन नहुने उनको तर्क छ । उनले अहिलेसम्म आफूले पाएको पुरस्कारमा तोकेबमोजिम नै पुरस्कार पाएको भन्दै पुरस्कार दिने संस्थानहरूले अब विचार गर्नुपर्ने बताए ।
लेखकले लेखेको लेख कुनै पत्रिकाले छापेमा ३०० रुपैयाँ दिनुपर्नेमा १५ वा २५ प्रतिशत कर काट्ने गरेको उनको गुनासो छ । उनले यस अवस्थाबाट आम नेपाली लेखकहरू पीडित रहेको बताए । उनले नेपाली लेखकहरूले लेखेर ठूलो रकम पाउन सकिन्न भन्ने थाहा पाएर कतै गुनासो नगरेको बताए ।