काठमाडौं । दोस्रो वरीयताप्राप्त बेलारुसकी आर्यना साबलेन्काले मंगलबार युक्रेनकी एलिना स्भितोलिनालाई हराउँदै फ्रेन्च ओपनको सेमिफाइनलमा स्थान बनाएकी छिन् । खेलपछि हात मिलाउने प्रतिक्षामा बसेकी साबलेन्कासँग स्भितोलिनाले हात मिलाइनन् ।

२५ वर्षीया साबलेन्काले अब फाइनल प्रवेशका लागि चेक गणतन्त्रकी क्यारोलिना मुचोभासँग प्रतिस्पर्धा गर्नेछिन् । २६ वर्षीया पूर्वउपविजेता अनास्तासिया पाभल्युचेन्कोभालाई ७–५, ६–२ को स्कोरमा पराजित गर्दै सेमिफाइनलमा स्थान बनाएकी हुन् । उनी करियरमा पहिलोपटक ग्राण्डस्लामको सेमिफाइनलमा स्थान बनाउन सफल भएकी हुन् ।

गत वर्ष रुसले युक्रेनमा आक्रमण गरेपछि २८ वर्षीया स्भितोलिनाले रुस र बेलारुसका खेलाडीसँग हात नमिलाउने बताएकी थिइन् । स्भितोलिनाले भन्छिन्, “निष्पक्ष भन्नुपर्दा मलाई थाहा छैन उनी किन पर्खिरहेकी थिइन् ? किनभने हात मिलाउनेबारे मेरा भनाइहरू स्पष्ट थिए ।’’

खेल सकिएपछि साबलेन्का प्रतिद्वन्द्वीसँग हात मिलाउन नेटमा पर्र्खिरहेकी थिइन् । तर, स्भितोलिनाले अस्विकार गर्दै हात मिलाउन मानिनन् । त्यसपछि स्भितोलिनाले फ्रेन्च ओपनमा उपस्थित समर्थकले गिज्याएका थिए । साबलेन्काले स्भितोलिनालाई ६–४, ६–४ को स्कोरमा हराएकी थिइन् ।

रुस–युक्रेन युद्धबारे धारणा माग गर्दै पत्रकारले धेरै प्रश्न सोधेपछि साबलेन्काले यसअघि दुई पत्रकार सम्मेलन छाडेकी थिइन् । तर, उनले आज फेरि पत्रकारलाई सम्बोधन गरिन् ।

“मेरो देश कुनै पनि द्वन्द्वमा होस् भन्ने म चाहन्न । म युद्धलाई समर्थन गर्दिन,’’ सिजनको सुरुमै सम्पन्न अष्ट्रेलियन ओपनको उपाधि जित्न सफल साबलेन्काले भनिन्, “युद्धलाई समर्थन गर्दिन भन्नुको मतलब म अहिले (बेलारुसका राष्ट्रपति) अलेक्जेन्डर लुकाशेन्कोलाई समर्थन गर्दिन ।’’

साबलेन्काले यसअघि पत्रकार सम्मलेन छाड्नुमा मानसिक स्वास्थ्यको कारण देखाएकी थिइन् । र उनले पत्रकार सम्मेलनमा युद्धका बारेमा पटकपटक प्रश्न उठाउँदा आफूले असुरक्षित महशुस गरेको बताएकी थिइन् । उनले पत्रकार सम्मेलन छाडेर नियम उल्लंघन गरेकोमा कुनै पछुतो नरहेको बताइन् ।

“यहाँ आउन नपाउँदा मलाई साँच्चै नराम्रो लाग्यो । म निदाउन सकिन । ती सबै नराम्रा भावनाहरू मेरो दिमागमा थिए,’’ सबलेन्काले भनिन्, “मलाई आफ्नो निर्णयमा पछुतो छैन । मैले वास्तवमै अपमानित महसुस गरें । साँच्चै नराम्रो महसुस गरें । मेरो मतलब ग्रान्ड स्लाममा यो दबाब चिर्न सक्नुपर्छ । मैले आफूलाई खेलमा ध्यान केन्द्रित गर्ने प्रयास गरें । आशा छ कि तपाईंहरूले मेरो भावना बुझ्नुहुनेछ । तपाईंलाई थाहा छ, तपाईंहरू सबैलाई म साँच्चिकै सम्मान गर्छु । म सधैं खुला छु । तपाईंले जे चाहनुहुन्छ सोध्न सक्नुहुन्छ । तपाईंले सबै जानकारी पाउनुहुनेछ । तर, पछिल्लो पत्रकार सम्मेलनलाई राजनीतिक टीभी कार्यक्रम बनेको महसुस भयो । र म राजनीतिमा विशेषज्ञ होइन । म केवल एक टेनिस खेलाडी हुँ ।’’