काठमाडौं । नेपाल वायुसेवा निगम (नेपाल एयरलाइन्स)को खुद सम्पत्ति सात अर्ब ऋणात्मक रहेको छ ।

आइतबार अर्थ मन्त्रालयले सार्वजनिक गरेको ‘सार्वजनिक संस्थानको वार्षिक स्थिति’अनुसार निगमको खुद सम्पत्ति सात अर्ब ८४ करोड १५ लाख ५२ हजार ७६४ रुपैयाँ ऋणात्मक रहेको छ ।

मन्त्रालयको तथ्यांकअनुसार निगमको दीर्घकालीन ऋण ३६ अर्ब तीन करोड ९२ लाख ३६ हजार ३२४ रुपैयाँ पुगेको छ । अल्पकालीन ऋण ४८ करोड ५८ हजार ६३ हजार ८२ रुपैयाँ रहेको छ ।

निगमको कुल सञ्चालन आय १६ अर्ब ४२ करोड १६ लाख ७९ हजार २१६ रुपैयाँ रहेको छ । कुल सञ्चालन लागत १८ अर्ब ३६ करोड सात लाख २४ हजार २६५ रुपैयाँ रहेको छ ।

निगमको गत आर्थिक वर्ष २०७८/७९ को खुद नोक्सान एक अर्ब ७० करोड ३० लाख ६८ हजार रुपैयाँ रहेको छ । २०७८/०७९ सम्मको सञ्चित नोक्सान १५ अर्ब ४७ करोड ९० लाख रुपैयाँ रहेको तथ्यांकमा उल्लेख गरिएको छ ।

निगमको नेपाल सरकारलाई बुझाउनु पर्ने ऋण तीन अर्ब ६० करोड ९८ हजार रुपैयाँ र ब्याज रकम नौ करोड ५९ लाख रुपैयाँ रहेको छ ।

यस्तै, निगम बैंक तथा वित्तीय संस्थालाई बुझाउनु पर्ने ऋणको साँवा रकम ३३ अर्ब ९३ करोड ७३ लाख रुपैयाँ र ब्याज रकम तीन अर्ब २५ करोड ३१ लाख रुपैयाँ रहेका छ ।

नेपाल सरकारलाई तिर्न बाँकी राजस्व रकम एक करोड ६१ लाख ५७ हजार २५२ रुपैयाँ रहेको छ । निगमले ६१ लाख लगानी गरेको छ ।

निगममा अहिले कुल एक हजार ३६३ जना कर्मचारी रहेका छन् । जसमा स्थायी ८३६ जना, अस्थायी २२७ र करार २७३ जना कर्मचारी रहेका छन् ।