काठमाडौं । प्रधानमन्त्री पुष्पकमल दाहाल ‘प्रचण्ड’ले ईपीजीको प्रतिवेदन र मिचिएको सिमानाका विषयमा भारत भ्रमणका बेला उपयुक्त तरिकाले छलफल गरिने बताएका छन् ।

सरकारको नीति तथा कार्यक्रममाथि सांसदहरूले उठाएका प्रश्नहरूको शनिबार प्रतिनिधिसभा बैठकमा जवाफ दिँदै उनले योपटकको भारत भ्रमणमा संवादका माध्यमबाट समस्या समाधान गर्ने गरी अघि बढ्ने बताए ।

“भारत भ्रमणको क्रममा ईपीजी र सीमाको विषय उठ्छ कि उठ्दैन भनेर प्रश्न उठेको छ,” उनले भने, “यी विषयमा मेरो गम्भीर रूपले ध्यान छ । उपयुक्त तरिकाले छलफलमा जान्छन् ।”

• प्रधानमन्त्रीको भारत भ्रमण : १८ गते मोदीसँग वार्ता

प्रधानमन्त्री प्रचण्डले पञ्चेश्वर परियोजनाका विषयमा छलफल चलिरहेको भन्दै धेरै वर्षपश्चात् यसलाई अघि बढाउनेबारे नयाँ समझदारी हुने विश्वासमा आफू रहेको बताए ।

भारतले हिन्दु धर्म प्रचारका लागि नेपालमा लगानी गरेको विषय पनि सांसदहरूले प्रश्न उठाएका थिए । उक्त विषय अमेरिकी प्रतिवेदनमा उल्लेख थियो । प्रधानमन्त्री प्रचण्डले यो विषयमा अमेरिकालाई ‘नोट’ पठाइसकेको जानकारी दिए ।

“धर्मान्तरणबारे के भएको छ भनेर सोध्नुभएको छ,” उनले भने, “नेपाल सरकारको तर्फबाट गम्भीर ध्यानाकर्षणसहित अमेरिकी दूतावासमार्फत अमेरिकी सरकालाई नोट पठाइएको छ ।”

आफ्नो भारत भ्रमण क्रममा एयर रुट लिने बारेमा गम्भीर रूपले कुरा हुने उनले उल्लेख गरे । उनले यो भ्रमणपश्चात् नेपालले नयाँ एयर रुट पाउने प्रवल सम्भावना रहेको बताए ।

“यो विषय गम्भीर रूपले एजेन्डामा राखेर छलफल गरिएको छ । अहिले यति मात्र भन्छु,” उनले भने ।

उनले भारत भ्रमण क्रममा ‘ट्रेड ट्रान्जिट’का विषयमा सहमति हुने जानकारी पनि दिए । “२०१९ देखि रोकिएको काम योपटक अघि बढ्छ भन्ने मेरो विशवास छ,” उनले भने ।

उनले सार्कको बैठक बस्नेबारे पनि छलफल चलिरहेको बताए ।

प्रधानमन्त्री प्रचण्डको भारत भ्रमण यही जेठ १७ देखि २० गतेसम्म हुने तय छ ।