काठमाडौं । प्रधानमन्त्री पुष्कमल दाहाल ‘प्रचण्ड’ले सरकाको नीति तथा कार्यक्रम राष्ट्रिय सहमतिको आधारमै ल्याइएको बताएका छन् । नीति तथा कार्यक्रममाथि सांसदहरूले उठाएका प्रश्नहरूको शनिबार प्रतिनिधिसभा बैठकमा जवाफ दिँदै उनले यस्तो बताएका हुन् ।

“प्रमुख प्रतिपक्ष दलको नेतालाई पनि सम्झना छ, मैले त्यो प्रस्ताव पहिलो गठबन्धनको साझा न्यूनतम कार्यक्रममा आधारित भएर बोलेर तल झर्दा हिस्टोरिक एन्ड एक्सिलेन्ट भन्नुभएको थियो, म ऊर्जावान् भएको थिएँ,” उनले भने, “केही समयपछि दोस्रो गठबन्धन बन्यो । अर्को साझा न्यूनतम कार्यक्रम बनाइयो । पहिलो साझा न्यूनतम कार्यक्रमको राम्रो कुरा समावेश गरेर बनाउनुपर्छ भनेर हामीले बनाइयो । त्यसकारण यो नीति कार्यक्रम दुवै गठबन्धनको साझा न्यूनतम कार्यक्रमको हो भन्न चाहन्छु ।”

उनले नेकपा (एमाले)सहितको तत्कालीन गठबन्धनबाट आफू प्रधानमन्त्री बनेको उल्लेख गरे । सोही कारण प्रधानमन्त्रीमा एमालेको लगानी छ भनेर किन नमान्ने भन्दै उनले प्रश्न समेत गरे ।

“संसदीय परम्परामा शतप्रतिशत माननीयहरूको विश्वासको मत ९९ दशमलव २५ सहितको समर्थन प्राप्त हुने सौभाग्य प्राप्त भयो,” उनले भने, “प्रधानमन्त्री भएको पहिलो गठबन्धनले बनेको हो । यो प्रधानमन्त्रीमा आफ्नो पनि लगानी छ भनेर किन नमान्ने ? पोजेटिभ हिसाबले किन नहेर्ने ? नेतृत्वको हिसाबले सामूहिक लगानीमा बनेको किन नभन्ने ?”