काठमाडौं । सत्तारूढ दल नेकपा (माओवादी केन्द्र)का सांसद देवेन्द्र पौडेलले जनयुद्ध शब्दको विरोध गरेका सांसद योगेश भट्टराईलाई जवाफ फर्काएका छन् ।

सोमबारको प्रतिनिधिसभा बैठकमा आर्थिक वर्ष ०८०÷०८१ को नेपाल सरकारको वार्षिक नीति तथा कार्यक्रममाथिको छलफलमा नेकपा (एमाले)का सचिवसमेत रहेका सांसद भट्टराईले जनयुद्ध शब्द नीति कार्यक्रममा परेको भन्दै विरोध गरेका थिए । 

भट्टराईपछि बोलेका पौडेलले परिवर्तनका आन्दोलनलाई सम्मान गर्न सिक्न अनुरोध गरे । उनले जनताको छोराछोरी लडेको जनयुद्धले अहिलेको परिवर्तन सम्भव भएको भन्दै वृहत् १२ बुँदे सम्झौता नभुल्न पनि अनुरोध गरे ।

भर्खरै बोल्ने मान्यज्यूले केही विषय उठाएर जानुभयो जनयुद्धको बारेमा । मान्यज्यूलाई एकपटक डिक्सनरी पल्टाएर हेर्न म अनुरोध गर्न चाहन्छु,” उनले भने, “माछा युद्ध थियो, भालु युद्ध थियो, जङ्गलका अर्नाहरू लडेका थिए कि रूख, ढुंगाहरू लडेका थिए ? मान्यजी डिक्सनरी पल्टाएर हेर्नुहोला ।”

उनले मानिसले लडेको युद्धलाई जनआन्दोलन वा जनयुद्ध भनिने भन्दै उनले मानिसका छोराहरू युद्धमा लडेको बताए ।

“बिर्सिनुभयो वृहत शान्ति सम्झौता ? तपाईंको नेताले १२ बुँदे सहमतिमा हस्ताक्षर गरेको बिर्सनुभयो मान्यज्यू ?,” उनले थपे, “नेपाली जनतालाई सार्वभौम बनाउनका निम्ती, संविधासभाबाट संविधान बनाउनका निम्ती जनयुद्ध लडिएको थियो । म हजारपटक आँखा जुधाएर बहस गर्न तयार छु, आउनुहोस् बहस गर्न । नेपाली जनताले एकात्मक शाहवंशीय राजन्त्रको अन्त्य गरेर संघीय लोकतान्त्रिक गणतन्त्र ल्याउन लडाइँ लडिएको थियो । इतिहासलाई नबिर्सौँ । यो रोष्टममा आएर कटाक्ष गर्नुभन्दा मिलेर जाने कुरा गरौँ ।”

अहिले धनगढीमा नागरिक अभिनन्दनबाट राजतन्त्र फर्काउने कुरा चलिरहेको भन्दै त्यहाँ गएर बहस गर्न आफूहरू संसद्मा सहकार्य गर्न तयार भएको बताए । अहिले गणतन्त्रलाई सहकार्यबाट जोगाउनुपर्ने अवस्था भएको भन्दै विगतका सबै आन्दोलनको सम्मान गर्न सिक्न पनि उनले भट्टराईलाई अनुरोध गरे ।