काठमाडौं । चिकित्सा विज्ञान राष्ट्रिय प्रतिष्ठान (न्याम्स)अन्तर्गतका आवासीय चिकित्सकले आजदेखि वीर अस्पतालमा आन्दोलन सुरु गरेका छन् । बुधबार चिकित्सकले हातमा कालो पट्टी बाँधेर सेवा दिइरहेका छन् ।

चिकित्सकले बिहीबार एक घण्टा र शुक्रबार दुई घण्टा सबै काम छाडेर अस्पताल परिसरमा धर्ना दिने बताएका छन् ।

शनिबारसम्म पनि आफ्ना माग सम्बोधन नभए आइतबारदेखि अस्पतालका कुनै पनि सेवामा संलग्न नहुने रेजिडेन्ट एसोसिएसन अफ न्याम्सले जनाएको छ ।

न्याम्समा अध्ययन गरी विभिन्न अस्पतालमा कार्यरत ४३८ आवासीय चिकित्सकले फागुनयताको निर्वाह भत्ता नपाएकाले आन्दोलनका कार्यक्रम घोषण गर्नुपरेको एसोसिएसनका अध्यक्ष शेषराज घिमिरेले बताए ।

आवासीय चिकित्सकको निर्वाह भत्ता चिकित्सा शिक्षा आयोगबाटै नआएका कारण भुक्तानीमा समस्या भएको वीर अस्पतालका कार्यकारी निर्देशक सन्तोष पौडेल बताउँछन् ।

एमडी, एमएस र एमडीएस अध्ययनरत आवासीय चिकित्सकले मासिक निर्वाह भत्ताका रूपमा आठौँ तहबराबर ४८ हजार ७ ३७ र डीएम, एमसीएच अध्ययन गरिरहेकाहरूले नवौँ तहबराबर ५६ हजार ७८७ रुपैयाँ पाउने व्यवस्था छ ।