काठमाडौं । उपप्रधानमन्त्री तथा गृहमन्त्री नारायणकाजी श्रेष्ठले नक्कली भुटानी शरणार्थी प्रकरणमा कसैले पनि आफूमाथि दबाब नदिएको बताएका छन् ।

शीर्ष नेताको बैठकमा भाग लिएर बाहिरिने क्रममा मन्त्री श्रेष्ठले कोही पनि निर्देष नफस्ने र दोषी नउम्कने बताए । उनले सुशासनको अभाव र भ्रष्टाचारले समृद्धि प्राप्त हुन नदिने भन्दै त्यसका लागि सरकारले काम गरिरहेको बताए ।

“यो सरकार समृद्धिको पक्षमा छ, सामाजिक न्यायको पक्षमा छ । भ्रष्टाचार नियन्त्रण र सुशासनबिना समृद्धिको लक्ष्य हासिल गर्न सकिँदैन,” श्रेष्ठले भने, “त्यसैका आधारमा हामी काम गर्दै छौँ ।”

उनले नक्कली भुटानी शरणार्थी प्रकरणमा त्यही काम सरकारले सुरुआत गरेको बताए ।

“अहिले नक्कली भुटानी शरणार्थी बनाउने र आर्थिक लाभका लागि संगठित रुपमा ठगी भएको छ । त्यसमा हामी काम गरिरहेका छौँ,” श्रेष्ठले भने, “अनुसन्धान गरिरहेको छौँ । दोषी कोही उम्कँदैन, निर्दोष कोही फस्दैनन् ।”

उनले शीर्ष नेताहरुको बैठकमा नक्कली भुटानी शरणार्थी प्रकरणका विषयमा छलफल पनि नभएको बताए ।

“आजको शीर्ष तहको बैठक संसद्मा रहेका विधेयकहरु अघि बढाउने र राष्ट्रिय विषयहरुमा सत्तापक्ष र प्रतिपक्ष समझदारीमा अघि बढ्ने विषयमा छलफल भएको रहेछ,” श्रेष्ठले भने, “मैले प्रमुख प्रतिपक्षी दलका नेता आदरणीय केपी शर्मा ओलीसँग मैले बालकोटमा गएर भेटेको पनि शरणार्थी प्रकरणबारे होइन । उहाँमाथि पूर्वमा भएको आक्रमण भएको विषयमा क्ुराकानी भएको हो ।”