काठमाडौं । स्वास्थ्य सेवा विभागले ४४ करोड ५१ हजार रुपैयाँमा खरिद गरेका १६७ वटा मेसिनको जडान विवरण नै नभएको पाइएको छ । 

यही वर्ष चारवटा आयातकर्तामार्फत् खरिद गरिएका ती मेसिन जडान नै नगरी भुक्तानी गरेको पाइएको हो । 

विभागले अटोमेडेट बायोकेमिस्ट्री एनालाइजर १० सेट, फुल्ली अटोमेटेड हेमाटोलोजी, १० सेट, इआरसीपी मेसिन एक सेट, पोर्टेबल मोबाइल एक्सरे मेसिन १३ सेट र हेमोडायलाइसिस मेसिन १३३ सेट खरिद गरेको थियो ।  

ती मेसिनका लागि रकम भुक्तानी गरिसकेको छ । तर, जडान र तालिम सञ्चालनको प्रमाण पेस नगरेको महालेखा परीक्षकको यस वर्षको प्रतिवेदनले देखाएको छ । 

मेसिन उपकरण खरिद सम्झौताको विशेष सर्तअनुसार सामान डेलिभरी जडान र सञ्चालन तालिमसमेत पूरा गरेपछि मात्रै भुक्तानी गर्नुपर्ने व्यवस्था छ ।