काठमाडौं । केही समय अगाडि दयाहाङ राईले निर्देशन गरेको नाटक ‘डिग्री माइला’लाई अब दर्शकले चलचित्रको रूपमा पनि देख्ने भएका छन् । रामबाबु गुरुङले यो चलचित्रलाई निर्देशन गर्ने भएका छन् ।
चलचित्रको मुख्य भूमिकामा दयाहाङ राई स्वयं हुनेछन् । चलचित्र दसैँमा रिलिज हुने निर्देशक गुरुङले बताएका छन् ।
‘डिग्री माइला’ दसैँमा रिलिज हुँदा यो चलचित्र ‘पशुपतिप्रसाद–२ भष्मे डन’सँग जुध्नेछ । दीपेन्द्र के खनालले निर्देशन गर्ने चलचित्र पशुपतिप्रसाद–२ भष्मे डन’ले यसअघि नै दसैँमा आउने घोषणा गरिसकेको छ ।
लामो सार्वजनिक बिदाको अवसर पारेर विशेषतः ठूला ब्यानरका चलचित्र प्रदर्शनमा आउने गरेका छन् । यो पटक पनि बजारमा राम्रो छवि बनाएका निर्देशक खनाल र गुरुङका चलचित्र एकै समय आउने भएका छन् । यसअघि पनि यी दुई निर्देशकका चलचित्र एकै पटक रिलिज हुँदै आएका छन् । गुरुङ निर्माता रहेको ‘घाम पानी’ र खनाल निर्देशक रहेको ‘लभ लभ लभ’ पनि एकै मितिमा नयाँ वर्षाको छेको पारेर रिलिज भएका थिए । गुरुङको निर्देशन रहेको ‘सेन्टी भाइरस’ र खनाल निर्देशित ‘आमा’ पनि एकै दिन रिलिज भएका थिए ।
यसपटक फेरि संयोग भनौं या जानाजान दुवै निर्देशकका चलचित्र एकै समय आउने देखिएको छ । यद्यपि, वितरक र निर्माण पक्ष बसेर मितिमा छलफल गरेर कोही अघि र कोही पछि आउने गरेको विगत भने छ । तर, यी दुई निर्देशक भने एकै दिन आउने गरेका छन् ।
अघिल्लो महिना देशकै ठूलो मल्टिप्लेक्स चेन क्यूएफएक्सले एकै डेटमा ठूला दुई वा त्योभन्दा धेरै चलचित्र रिलिज नगर्ने घोषणा गरेको थियो । फागुन १९ मा अपेक्षित मानिएका ‘छक्का पञ्जा–४’ र ‘छड्के–२’ एकैदिन आउन लागेपछि क्यूएफएक्सले उक्त कुरा बताएको थियो । निर्माता र प्रदर्शक दुवैलाई घाटा हुने भन्दै क्यूएफएक्सले ठूला चलचित्र एउटै डेटमा रिलिज नगर्ने जनाएको थियो ।
