site stats
ब्लग
बहिनी जेरीलाई पत्र

सबैकी प्रिय जेरी बहिनी,

बहिनी किन भनेको भने जुन पीडा तपाईँले अहिले भोगिरहनु भएको छ त्यो मैले सात वर्षअगाडि नै भोगेर पार भैसकेकी छु । विभिन्न मिडियामार्फत मैले चिनेको जेरी दरिलो व्यक्तित्व भएकी सशक्त महिला हुन् । नेपाली समाजमा तपाईँको आफ्नै अस्तित्व छ । तपाईँलाई आफ्नो परिचय दिन कुनै सम्बन्धको आवश्यकता पर्दैन । केही समयअघि तपाईँको व्यक्तिगत जीवनको बारेमा प्रिय नलाग्ने घटना सुनियो । तपाईँको सहमतिमा हो कि सहमतिबिना  नै हो कमजोर भई बिलौना गरेका केही भिडियो सार्वजनिक भए ।  

सम्बन्ध टुट्नु कसैको लागि पनि सुखद हुँदैन । किनभने सँगै थुप्रै विश्वास र अपेक्षा सकिन्छन् । व्यक्तिगत अनुभव छ मेरो विगोगले कति रुन्छ यो मन ? तर, म कहिल्यै कसैको अगाडि रोइन । धेरैपटक आसुका भेल बगाएकी छु मैले र मेरो ईश्वरलेमात्र थाहा पाउने गरी । साँच्चै भनु भने पाएका चोटको बेलिबिस्तार सबैका सामु लगाई रोएर अबला र कमजोर महिलाको उदाहरण बन्नु थिएन । एउटा कुरा भन्छु- अरुको आँसु र घाउ देख्दा कसलाई रमाइलो लाग्छ र ?  विरक्त लाग्छ । तपाईँ  त उदाहरण हो सामान्य महिलाका लागि । धेरै महिलाले तपाईँबाट सिक्छन् । तपाईँ  के सन्देश दिन चाहनुहुन्छ ? वैवाहिक सम्बन्ध टुटेपछि महिला अबला हुन्छन्, बिचरा हुन्छन् ? संसारमा यसअघि कसैलाई नपरेको पीडा तपाईँलाई परेको पनि त होइन नि । याद गर्नुस् बहिनी, बलियो हाँगा सानोतिनो बतासले भाँच्चिदैन । भाँचिने भनेको कमजोर हाँगा हो । बतासविहीन जीवन त पक्कै बनाउन सकिँदैन । कमजोर हाँगामा बस्नु भनेको भ्रममा बस्नु हो । यस्तो भ्रम त समयमै सकिएको राम्रो । जीवनमा नयाँ सुरुआत गर्न सकिन्छ । गौतम बुद्धको भनाइ छ  “ गलत मान्छेको संगत गर्नुभन्दा एक्लै हिँड्नु बेस ” । महिला एक्लै हुँदैमा बिचरी हुँदैनन् । बिचरी तब भइन्छ जब एउटा प्रेमविहीन मृत नाताको लासलाई बोकेर जीवनभर हिँड्नुपर्छ । 

NMB Bank
Dabur nepal
Agani Group

आखा खोलेर हेर्नुस् बहिनी, हिजो र आजमा केही बदलिएको छैन । हरेक बिहान मुस्कुराउने घामले तपाईँलाई किरण दिन्न भनेको छैन । हिजो र आजमा विभेद नगरी दिन्छ उसले  । आकाशले हिजो जसरी तपाईँको संरक्षण गरिरहेको थियो आज पनि त्यसरी नै गरिरहेछ । विभेद गरेको छ र ? हिजो जसरी तपाईँलाई देखेर फूल हाँस्थ्यो आज पनि हाँसिरहेछ  हेर्नुस् त । राज्यले जे जति सुविधा हिजो दिएको थियो आज पनि दिन्छ तपाईँलाई । बरु समताका कारण दिने सुविधा बढी हुनसक्ला । कुनै पनि नागरिकले तिमी 'डिभोर्सी' हौ तिम्रो गीत सुन्दिन भन्दैन । जन्मदै ल्याएका रगतका नाता र आफैँले आर्जेका नाता हिजोभन्दा आज बढी सहयोगी पाउनु हुनेछ तपाईँले  । उनीहरूले तपाईँलाई भावनात्मकरूपमा बलियो राख्न कोसिस गर्नेछन् । सबैभन्दा महत्वपूर्ण तपाईँको ईश्वर सधैँ तपाईँसँगै हुनेछन् । कहिलै तपाईँको  साथ छाड्नेछैनन् । बुझ्नुस्  बहिनी - हिजोभन्दा आज एउटा कुरामात्र फरक भएको छ । एक व्यक्तिसँग तपाईँको सम्बन्ध कागजीरूपमा समाप्त भएको छ । वास्तवमै  भन्ने हो भने प्रेमलाई कागजले रोक्न सक्छ र ? जहाँ प्रेम छैन कागजले बाँध्न पनि सक्दैन । सम्बन्धको मूल प्रेम हो कागज होइन । कागजमा सम्बन्ध सकिनु धेरैअघि भावनात्मकरूपमा मरिसकेको हुन्छ । कारण जे भए नि के फरक पर्छ र ? सम्बन्ध लास नै भई सकेपछि दाहसंस्कार गरेकै ठीक । 
 
बहिनी ! जीवनमा शान्ति चाहनुहुन्छ भने स्वीकार गर्नुस् आफैँलाई । स्वीकार गर्नुस्, मान्छे चिन्न तपाईँबाट गल्ती भयो । स्वीकार गर्नुस्, ऊ तपाईँले चाहेजस्तो थिएन भने तपाईँ  पनि त उसले सोचेजस्तो हुनसक्नु भएन । स्वीकार गर्नुस् सँगै बसेर एक सन्तानलाई जन्म दिई सक्दा पनि साँचो प्रेम फुल्न सकेन तपाईँहरूबीच । स्वीकार गर्नुस् अब तपाईँ एक 'डिभोर्सी' हो । कुनै दिन अरूलाई 'डिभोर्सी' भन्नुहुन्थ्यो होला । आज तपाईँ पनि त्यही समूहमा पर्नु भएको छ । सबै कुरा विनासंघर्ष स्वीकार गर्नुस् । माफ गर्नुस्, सबैलाई जहाँजहाँबाट पीडा पाउनु भयो ।  माफ गर्नुस् आफैँलाई पनि विगतमा भएका गल्तीका लागि । आखिर मान्छेले सिक्ने गल्तीबाट नै हो । गल्ती गर्नु नै खराब होइन । तर, गल्ती गरे भनेर गल्तीमै हराउनु चाही खराब हो ।  जे जस्तो छ त्यसलाई त्यस्तै देख्न सक्नुपर्छ । धेरै सोची अतिरञ्जित बनाएर केही लाभ हुँदैन बरु हानी नै हुन्छ । 

विश्वास गर्नुस्, जीवनमा समस्या हामीलाई सिध्याउन होइन बलियो बनाउन आउँछन् । पीडामा ठूलो शक्ति हुन्छ । सात वर्षअगाडि त्यो घटना मेरो जीवनमा नभएको भए आज म जे छु सायद त्यो हुँदैन थिएँ होला । जीवनमा आइलागेका समस्यालाई समधान गर्नसक्ने यो स्तरको आत्मविश्वास मसँग हुँदैन थियो होला । चोट सही सबै कुरालाई बिर्सेर अगाडि बढ्नसक्ने क्षमता मसँग हुँदैन थियो होला । त्यस घटनाले मभित्र भएको क्षमतालाई मसँग परिचय गरायो ।  जे हुन्छ राम्रो हुन्छ या राम्राका लागि हुन्छ । 

Global bank

बहिनी ! आजबाट नयाँ जीवनको सुरु गर्नुस् । आजसम्म गर्न चाहेर पनि पूरा गर्न नसकेको सोख भए पूरा गर्नुस् । समयको सीमाले छुटाएका मित्रहरूसँग सम्पर्क गर्नुस् । विभिन्न ठाँउ घुम्नुस् , नाच्नुस्,  गाउनुस् । आफैँलाई समय दिनुस् । आफ्नै प्रेममा पर्नुस् । उसले रचेको संसार बडो सुन्दर र प्रेमिल  छ । कण कण सुन्दरताले भरिएको यस विशाल संसारमा यस्ता झिनामसिना चोट कता बिलाउछन् कता ! 

                                                      
सशक्त र प्रगतिशील जीवनको शुभकामना

(ओशोधारा मैत्री संघ )


 

प्रकाशित मिति: बुधबार, मंसिर २१, २०७९  ०९:५५
प्रतिक्रिया दिनुहोस्
सम्पादकीय