काठमाडौं । मंसिर ४ गते सम्पन्न प्रतिनिधिसभाको मतपरिणाम सार्वजनिक भइरहेको छ । जारी मतपरिणामअनुसार प्रत्यक्षतर्फ नेकपा (एमाले) दोस्रो र समानुपातिकतर्फ पहिलो स्थानमा देखिन्छ । एमालेका उपमहासचिव पृथ्वीसुब्बा गुरुङ चुनावी परिणाम अनपेक्षित आएको बताउँछन् ।
 
लमजुङबाट प्रतिनिधिसभा सदस्य बनेका गुरुङले बाह्रखरीसँगको कुराकानीमा अब वामपन्थी शक्तिहरु मिलेर सरकार बनाउनुपर्ने धारणा राखेका छन् । प्रस्तुत छ, उनीसँग बाह्रखरीका कुञ्जरमणि भट्टराईले गरेको कुराकानीको सम्पादित अंश:- 

हालसम्मको मतमत परिणामलाई कसरी हेर्नुहुन्छ ? एमालेले सोचेजस्तो नतिजा ल्यायो त ?

एमालेले सोचेभन्दा कमजोर नतिजा आयो । हामी सुविधाजनक रुपमा ठूलो पार्टी बन्छौँ भन्नेमा थियौँ । ११५–२० सिट आउला भन्ने थियो । ज्यादा घेराबन्दीमा परियो । त्यसले सोचेजस्तो नतिजा आउन कठिन भयो ।
 
कम सिट आउनुमा आन्तरिक कारण पनि छन् कि बाह्य घेराबन्दी मात्रै हो ?

यसपटक पार्टीभित्र अभूतपूर्व एकता देखियो । त्यो राम्रो हो । एकताबद्ध हुँदाहुँदै ठूलो घेराबन्दीमा परियो । त्यो चक्रब्यूह तोड्न गाह्रो भएको हो । घेराबन्दीका बीचमा पनि एमाले ठूलो पार्टी बन्ने होडमा छ । एमालेलाई कसैले निषेध गरेर निषेध गर्न सक्दैन भन्ने पुष्टि भयो ।
 
तर, सरकार चलाउन आवश्यक पर्ने स्ुविधाजनक सिट पाएको भए धेरैसँग छलफल गरिरहनु पर्दैनथ्यो । राजनीतिक स्थिरतातर्फ लैजान, सही दिशामा लैजान र विकास निमार्णका लागि सहज हुन्थ्यो । तर, यो नतिजाले अलिक कठिन हुन्छ होला ।
 
एमालेले अब आफ्नै नेतृत्वमा सरकार बनाउन पहल गर्छ ?

एमालेले आफ्नै नेतृत्वमा सरकार बनाउन पहल गर्छ । एमाले र कांग्रेस अरुभन्दा ठूलो पार्टी हो । यसपटक जनमत छरिएको छ । माओवादी, एकीकृत समाजवादी, लोसपा, जसपा, रास्वपा, राप्रपालगायतका दलहरुमा सिट बाँडिएको छ । यसले मुलुकको राजनीति अस्थिर भयो । यसले राजनीतिले स्वाधीनताको मुद्दा कमजोर बनाउँछ । मुलुकमा स्थिरता कायम हुन असहज हुन्छ । 

मुलुकमा राजनीतिक स्थिरता नभएपछि सुशासन, विकास निर्माणको काममा बाधा गर्छ । संविधान कार्यान्वयनका बारेमा पनि संकट पैदा हुन्छ । अझै पनि संविधान सोचेजस्तो ढंगले कार्यान्वयन भएको छैन । संघीय लोकतान्त्रिक गणतान्त्रिक  शासन प्रणाली अझै बलियो भइसकेको छैन । 

त्यसका लागि संघीयता, लोकतान्त्रिक गणतन्त्र पक्षधरहरुको बीचमा देशभक्तिपूर्ण आन्दोलनमा अघि लागेका, सुशासन, विकासको अभियानका पक्षहरु बीच एकता भएन भने मुलुकको राजनीतिक व्यवस्थामाथि समस्या पैदा हुन्छ ।

सरकार गठनका लागि एमालेले रोज्ने दल कुन हो ?

सरकार गठन यहीसँग भनेर अहिले भन्न सकिन्न । सबैसँग कुरा भइरहेकै छ । कांग्रेस र एमालेबीच चाहिँ सरकार गठनको कुरा भएको छैन । हामीले पनि अरु दलसँग छलफल गरिरहेकै छौं । कांग्रेसले पनि गरिरहेकै देखिन्छ । 

तेस्रो शक्तिको रुपमा माओवादी, समानुपातिकको हिसाबाले रास्वपा चौथो शक्ति बन्ला । तर, प्रत्यक्ष सिट संख्याको हिसाबले त माधव नेपालजीको पार्टी छ । त्यस्तै राप्रपा, जसपा, लोसपा यिनै शक्तिहरुसँग कुरा गरेर एकजुट भएर गयो भने राम्रो हुन्छ । अझै वामपन्थीहरुबीच एकता भएर जाँदा राम्रो होला । 

राष्ट्रिय स्वतन्त्र पार्टी नयाँ पार्टी हो । उसले आफ्नो भिजन, मिसन, पोलेसी त केही ल्याएको छैन । एमाले, कांग्रेस सत्ता गठबन्धनको रुझानलाई नरुचाएर मान्छेले विद्रोह गरेका हुन् । उहाँहरुले कसरी जानुहुन्छ, त्यो त हेर्न बाँकी छ । तर, उहाँहरु (स्वतन्त्र पार्टी)ले देश विकासका लागि एमालेलाई समर्थन गनुपर्ने देख्छु । कांग्रेस विकासको एजेण्डा भएको पार्टी होइन् । देशभकत वाम लोकतान्त्रिक शक्तिहरुबीच एकता गरेर जाँदा राम्रो ।
 
अध्यक्ष ओलीले माओवादी अध्यक्ष प्रचण्डसँग कुरा गर्नुभएको थियो । सरकार गठनको कुरा भइसकेको हो ?

म लमजुङ भएकाले सबै कुरा त थाहा छैन । चुनावमा चियाको कपमा तुफान आउँछ । चुनाव सकिएपछि एउटा नेताले अर्कोलाई बधाई दिने राजनीतिक संस्कार हो । अहिलेलाई त्यही रुपमा बुझौँ । राप्रपा, जसपासँग हामीले चुनावी तालेमल गरेको हो । माओवादी र एकीकृत समाजवादीलाई यो गठबन्धनबाट अंकगाणितका हिसाबले फाइदा देखिएन ।
 
अहिलेको चुनावबाट रास्वपा, जनमत, नागरिक उन्मुक्ति पार्टीको उदयलाई एमालेले कसरी लिएको छ ?

अहिलेको परिणामले जे संकेत गरेको  छ, त्यो ठूला पार्टीहरुलाई पनि हो । तिमीहरु राम्रोसँग चल, गठबन्धन ठीक भएन भन्ने सन्देश पनि हो । उता, मधेसवादी दलहरु जसपा, लोसपा छन् । मधेसको मुद्दामा उभिएका दल मधेसको मुद्दा भन्दा पनि धेरै अन्य राजनीतिमा संलग्न भएकाले रुचाएको देखिएन । नागरिक उन्मुक्ति पार्टी र जनमत पार्टीको पक्षमा जनमत सिर्जना हुनुले पनि एउटा संकेत गरेको छ ।
 
खासगरी काठमाडौंको जनताले र युवा पंक्तिले माओवादी, एकीकृत समाजवादी र जनमोर्चा कांग्रेससँग मिलेको पट्क्कै, पटक्कै रुचाएनन् । त्यसको बिद्रोहको रुपमा रवि लामिछानेहरुको उदय भयो । रवि लामिछानेहरुको उदेश्य होला, युवाहरु होलान् तर मुलुक चलाउन त भिजन चाहियो नि । मुलुक चलाउन नीति, कार्यक्रम, अठोट र ठूलो संगठनात्मक शक्ति चाहिन्छ । त्यो उहाँहरुसँग कुनै छैन । तेस्रो शक्ति उदय हुनुले पार्टीहरुको आचरण सँच्चिनुपर्छ भन्ने संकेत पनि हो ।