काठमाडौं । नेपाल उद्योग वाणिज्य महासंघका अध्यक्ष शेखर गोल्छाले काठमाडौं निर्वाचन क्षेत्र नम्बर–८ स्थित सीतापाइला मावि मतदान केन्द्रबाट मतदान गरेका छन् ।

आइतबार बिहान मतदानपछि सञ्चारकर्मीसँग कुरा गर्दै उनले देशको समृद्धि र सुशासनको पक्षमा काम गर्ने उमेदवारहरूलाई मतदान गर्न आग्रह गरे । मतदानको अधिकार संविधानले दिएको भन्दै उनले सबैलाई आफ्नो मताधिकारको सदुपयोग गर्न आग्रह गरे ।

उनले भने, “जसले यो देशलाई अघि बढाउन सक्छ, जसले देशमा समृद्धि ल्याउन सक्छ र जोसँग विश्वास छ, जसले यो देशलाई राम्रो दिशा दिन सक्छ, त्यसैलाई भोट दिऔँ । यो हाम्रो नैतिक जिम्मेवारी पनि हो । कानुनी जिम्मेवारी पनि हो । संविधानले दिएको अधिकारबाट कोही पनि वञ्चित हुनु हुँदैन ।”

एकै चरणमा आज देशभर प्रतिनिधिसभा र प्रदेशसभा सदस्य निर्वाचनअन्तर्गत मतदान हुँदै छ । बिहान ७ देखि बेलुका ५ बजेसम्म मतदान गर्न सकिने निर्वाचन आयोगले जनाएको छ ।