काठमाडौं । सुनसरीको इनरुवा नगरपालिकाका नवनिर्वाचित पदाधिकारीले करारमा आफ्ना मान्छेलाई राखेको भन्दै कर्मचारीहरू आन्दोलित भएका छन् । १० दिनयता करारका कर्मचारीहरू जनप्रतिनिधिले आफ्ना मान्छेबाहेक अरूलाई निकालेको भन्दै आन्दोलनमा उत्रिएका हुन् ।

कर्मचारीको आन्दोलनका कारण नगरपालिकाको कामकाज १० दिनदेखि ठप्प भएको छ । उनीहरू आन्दोलनमा उत्रिँदा नगरसहित वडाको कामकाज प्रभावित बनेको छ ।

कार्य मूल्यांकनको आधार देखाउँदै ५७ कर्मचारी कटौती गरेको विषयलाई लिएर निष्कासनमा परेका कर्मचारीहरूले आन्दोलन गरिरहेका छन् । निष्कासनमा परेका कर्मचारीहरूले राजनीतिक स्वार्थ र पहुँचका आधारमा आफ्नाबाहेककालाई हटाइएको आरोप लगाएका छन् ।

नगरपालिकाका मेयर केदार भण्डारीले नगरपालिकालाई त्यति धेरै कर्मचारीको आवश्यकता नपरेकाले हटाएको बताए । उनले नगरपालिकाले आर्थिक भार व्यहोरेर ठूलो संख्यामा कर्मचारी राख्न नसक्ने उल्लेख गरे । करार म्याद थप नहुने उनको भनाइ छ ।

नगरपालिकाले सूचना प्रकाशित गर्दै साउन १ गतेदेखि लागु हुने गरी ५७ कर्मचारीको म्याद थप नहुने जनाएको थियो । नगरपालिकाले ५७ जनालाई हटाए पनि करार सेवाकै ७९ कर्मचारीको भने म्याद थप गरेको छ ।

विवाद समाधानका लागि भन्दै मेयर भण्डारीले यही साउन २० गतेसम्मको समय मागेका छन् ।