काठमाडौं । बुटबलमा केन्द्रीय कार्यलय रहेको सेवा विकास बैंकले चुक्तापुँजी बढाउन हकप्रद सेयर निश्कासन गरेको छ । 

बैंकले चुक्तापुँजीको १ बराबर १.२ सेयरको अनुपातमा १ सय रुपैयाँ अंकित मूल्य रहेको ५१ करोड ६ लाख  रुपैयाँ बराबरको हकप्रद सेयर निश्कासन गर्न लागेको हो । यही मंसिरको २३ गतेदेखि पुस २७ गतेसम्मका लागि बिक्री खुला गरेको बैंकले जनाएको छ । हकप्रद सेयर निश्कासनपछि बैंकको चुक्तापुँजी ९३ करोड ६२ लाख २१ हजार ४ सय रुपैयाँ पुग्ने छ । हाल बैंकको चुक्तापुँजी ४२ करोड ५५ लाख ५५ हजार रुपैयाँ छ ।

आगामी असारसम्म राष्ट्रिय स्तरको विकास बैंक हुन साढे २ अर्ब रुपैयाँ चुक्तापुँजी पु¥याउनुपर्ने छ । बैंकको कार्यक्षेत्र रुपन्देही, नबलपरासी र कपिलबस्तु गरी ३ जिल्ला मात्र छ । बैंकको सेयर मूल्य ३२१ रुपैयाँ छ । बैंकको बजार पुँजीकरण ३ अर्ब रुपैयाँ बढी छ ।

यस्तै चालु आर्थिक वर्षको पहिलो त्रैमाशमा बैंकले २ करोड ६४ लाख रुपैयाँ नाफा गरेको छ । गत आवको सोही अवधिमा बैंकले १ करोड २४ लाख रुपैयाँ नाफा गरेको थियो । गत आवको तुलनामा बैंकले नाफा दोब्बर बढाएकोछ । गत आवमा बैंकले कुल १० करोड ७६ लाख रुपैयाँ नाफा गरेको थियो । समीक्षा अवधिमा बैंकले ५ अर्ब ६ करोड रुपैयाँ निक्षेप परिचालन गरी ४ अर्ब ४० करोड रुपैयाँ लगानी गरेको थियो । बैंकको खराब कर्जा अनुपात १ प्रतिशत भन्दा कम छ ।