काठमाडौं । साताको तेस्रो कारोबार दिन सेयर बजारमा एकल अंकको सामान्य वृद्धि भएको छ । सोमबार २६५२.७५ अंकमा बन्द भएर मंगलबार प्रि–ओपन सेसनमा सामान्य ओरालो लागेर २६५२.२७ अंकमा खुलेको नेप्से १.९४ अंकको सामान्य वृद्धि हुँदा २६५४.६९ अंकमा बन्द भएको छ ।
बजारमा सुरुवातदेखि नै उतार–चढाव देखिँदा ‘इन्ट्रा–डे’ कारोबारमा २६६३.६४ अंकसम्म पुगेको नेप्से २६४०.४४ अंकसम्म झरेको थियो । बजार परिसूचक सामान्य बढे पनि कारोबार रकम भने घटेको छ । सोमबार साढे ७ अर्ब नाघेको कारोबार रकम आज ६ अर्बमा सीमित भएको छ । १ करोड ३० लाख १५ हजार १९३ कित्ता सेयर किनबेच हुँदा ६ अर्ब ५ करोड २२ लाख ३७ हजारको कारोबार भएको छ ।
मंगलबार, व्यापार, हाइड्रोपावर, उत्पादन, लघुवित्त, म्युचुअल फन्ड र लगानी उपसूचक हरियो हुँदा बजारलाई लिड गनर्ने बैंकिङसँगैँ होटेल तथा पर्यटन, विकास बैंक, वित्त कम्पनी, निर्जीवन र जीवन बिमा, तथा अन्य उपसूचकमा भने गिरावट भएको छ ।
लघुवित्त उपसूचक सर्वाधिक २.५६ प्रतिशतले वृद्धि हुँदा, व्यपार उपसूचक २.४३ प्रतिशत र हाइड्रोपावर उपसूचक १.२ प्रतिशतले बढेको छ । यता, होटेल तथा पर्यटन उपसूचक १.०६ प्रतिशत, अन्य उपसूचक ०.९५ प्रतिशत र बजारलाई लिड गर्ने बैंकिङ उपसूचक ०.४३ प्रतिशतले करेक्सन भएको छ ।
आज कारोबार रकममा एनसीसी बैंकले लिड गरेको छ । बैंकको २३ करोड ९ लाख ६४ हजारको कारोबार भएको छ । यस्तै, अरुण काबेली हाइड्रोपावरको २१ करोड ८३ लाख ९३ हजार र ग्रामीण विकास लघुवित्तको १६ करोड ८९ लाख ६८ हजारको कारोबार भएको छ ।
बजार परिसूचकमा सामान्य मात्रै वृद्धि भए पनि ९ कम्पनीको सेयर मूल्यमा सकारात्मक सर्किट लागेको छ । सकारात्मक सर्किट लाग्नेमा अधिकांश लघुवित्त र हाइड्रोपावर कम्पनी रहेका छन् । समता लघुवित्त महिला लघुवित्त, विशालबजार कम्पनी, सपोर्ट माइक्रोफाइनान्स, राधी विद्युत् कम्पनी, रुरु जलविद्युत् परियोजना, सिंगटी हाइड्रो इनर्जी, युनाइटेड मोदी हाइड्रोपावर र पञ्चकन्या माई हाइड्रोपावरको सेयर मूल्यमा सकारात्मक सर्किट लागेको छ ।
यता, चन्द्रागिरि हिल्सको सेयर मूल्य १.९८ प्रतिशतले घट्दा एनएलजी इन्स्योरेन्सको १.७३ प्रतिशत, हिमालयन जनरल इन्स्योरेन्सको १.६३ प्रतिशत र प्रुडेन्सियल इन्स्योरेन्सको सेयर मूल्य १.५१ प्रतिशतले घटेको छ ।
आज नेप्सेमा कारोबार भएको १०२ कम्पनीको सेयर मूल्य बढेको छ भने ७१ कम्पनीको सेयर मूल्य घट्यो । ११ कम्पनीको सेयर मूल्य भने स्थिर रह्यो ।
