सपनाको पुनरावृत्ति

नहराउँन देखेको सपनाहरू
बिहानै नदीमा पुगेर नुहाउन
नदीजस्तै
निर्मल बनेर बगिरहुन्
सुखरात्रिमा देखेको सपना

मिसिँदै जाऊन्
विपनासँगै सपनाका मिठासहरू
सपनाका सुललित प्रवाह
विपनाको समुद्रसम्म पुगेर फर्किउन
उठेर सपनाको तरङ्ग
आकासमा पुगेर
पुनः जुन बनेर उदाउन
विपना बन्न सक्ने गरी
उदाउन आँखाभरि सपनाका किरणहरू

समयसँगै नगुमोस् सपनाको परिचय
वेग हानेर नउडोस् सपनाको यान
उदाओस् सपनाको ध्रुवतारा
मेटाउन सकोस् सपनाले विपनाको झल्को
फुल्दै, फक्रँदै, झुल्कँदै, उदाउँदै
भइरहोस् सुखद सपनाको पुनरावृत्ति ।

० ० ०

अणुबाट अणुमै

जीवन पर्यन्त
तृष्णाले आतुर छ आर्यघाट
चिताले न रजस्वला देख्छ
न उमेर
न देख्छ नाङ्गो पेट
मस्तक फुटाउने तातो आगो ओकलेर
मसान मनाउँछ मान्छेको मृत्योत्सव

कतै मैनबत्ती
कतै चितापिण्ड
कतै उशीर

त्रिकाठीमा बालेको एकजोर बत्तीले
कसरी देखाउला र
प्रकाशमय स्वरूपको बाटो

शून्यबाट शून्यमा जान कै लागि
अणुबाट अणु मै जानका लागि
अतीत मौन बनाएर
मौनव्रति बन्दै
समाधीस्थ हुनु मै छ जीवनको सौरभ ।
(गोदावरी)