काठमाडौं । इजरायली सरकारले आइतबार २७ जना फ्रान्सेली सांसद र अधिकारीहरूको भ्रमण भिसा रद्द गरेको छ । ती सांसद र अधिकारीहरूको  जेरुसेलम र प्यालेस्टिनी क्षेत्रहरूमा भ्रमण सुरु हुनुभन्दा दुई दिनअगाडि इजरायलको यो निर्णय आएको हो ।

यो निर्णय फ्रान्सका राष्ट्रपति इमानुएल म्याक्रोनले आफ्नो देशले चाँडै नै प्यालेस्टिनलाई देशको मान्यता दिने घोषणा गरेपछि दुवैै देशबीच बढ्दो कूटनीतिक तनावको पृष्ठभूमिमा आएको हिन्दुस्तान टाइम्सले उल्लेख गरेको छ ।

इजरायलको आन्तरिक मामिला मन्त्रालयले यी २७ जना सांसदहरूको भिसा रद्द गर्ने निर्णय इजरायल देशको विरुद्ध काम गर्ने जोसुकै व्यक्तिहरूलाई प्रतिबन्ध लगाउन सक्ने कानुनअन्तर्गत गरिएको बताएको छ । फ्रान्सको वामपन्थी पार्टीका १७ जना सदस्यले यसलाई इजरायलले सामूहिक सजाय दिइएको आरोप लगाएका छन् ।

यसैबीच, राष्ट्रपति म्याक्रोनलाई हस्तक्षेप गर्न पनि आह्वान गरेका छन् । उनीहरूले जेरुसेलमस्थित फ्रान्सेली दूतावासको पाँचदिने भ्रमणको निमन्त्रणा गरेअनुसार भ्रमण गर्न लागेको बताए । साथै यी सांसदहरूको भ्रमणको उद्देश्य अन्तर्राष्ट्रिय सहयोग र शान्तिको संस्कृति बलियो बनाउने रहेको बताए ।