काठमाडौं । राष्ट्रपति रामचन्द्र पौडेलसँग वरिष्ठ कलाकारद्वय मदनकृष्ण श्रेष्ठ र हरिवंश आचार्यले भेट गरेका छन् । राष्ट्रपति कार्यालय शितलनिवासमा भएको भेटमा महजोडीले संघीय लोकतान्त्रिक गणतन्त्रलाई सुदृढ गराउन सुशासन, चुस्त सेवाप्रवाह र भ्रष्टाचार अन्त्यका लागि अभिभावकको हैसियतले राजनीतिक दलका नेताहरूलाई घचघच्याउन आग्रह गरेका हुन् ।

भेटपछि श्रेष्ठ र आचार्यले संघीय लोकतान्त्रिक गणतन्त्रप्रति जनताको अविश्वास नरहेको बताए । तर, राजनीतिक दलका नेताहरूको गलत क्रियाकलापप्रति जनताको असन्तुष्टि रहेको उनीहरूको भनाइ थियो । त्यस्ता गतिविधि रोक्दै सुधारका लागि राष्ट्रपतिको भूमिका हुनुपर्ने उनीहरूको सुझाव थियो । “देश बिग्रेको होइन, बनिरहेको छ तर सुशासन पटक्कै भएन, बिचौलियाले जनतालाई मारमा पारे । राष्ट्रपतिज्यूले सम्बद्ध सबैलाई घचघच्याइ दिनुपर्‍यो,” राष्ट्रपतिसँग भेटबारे कलाकार आचार्यले भने ।

आफूहरूले राष्ट्रपतिसँग ‘अरुलाई कसैलाई मन पराएका होइनन्, लोकतन्त्रभित्रै सुधार हुनुपर्‍यो भन्ने जनताको असन्तुष्टि हो, त्यसैले यसभित्रै सुधारका लागि पहल गर्न आवश्यक छ’ भनेको उनीहरूले जानकारी दिए ।