काठमाडौं । काठमाडौं उपत्यकामा आज (चैत १५) हुने गणतन्त्रवादी र राजावादीको प्रदर्शनका निम्ति उच्च सुरक्षा व्यवस्था गरिएको छ । प्रदर्शन शान्तिपूर्ण रूपमा गराउन नेपाल प्रहरी, सशस्त्र प्रहरी बल, राष्ट्रिय अनुसन्धान विभाग (गुप्तचर)का सुरक्षाकर्मी ठूलो संख्यामा परिचालन गरिएको छ ।

नेपाली सेनाको ‘इन्टेलिजेन्स’ टोली समेत खटाइएको छ । उपत्यका प्रहरी कार्यालयअन्तर्गत नियमित खटिने टोलीभन्दा करिब चार हजार प्रहरी थप गरिएको छ ।

सादा पोसाकका प्रहरीले दुवै पक्षका प्रदर्र्शनकारीको गतिविधि नियाल्न ड्रोन क्यामेरा समेत प्रयोग गर्ने उपत्यका प्रहरी कार्यालयका प्रवक्ता एवं एसएसपी शेखर खनालले जानकारी दिए ।

यस्तै, प्रहरीले भीड नियन्त्रणका निम्ति ‘वाटर क्यानन’ तयारी अवस्थामा राखेको छ ।

प्रदर्शनकारीले ‘अनावश्यक’ फोन नगरून् भनेर कल सम्पर्क टावरमा अवरोध गर्ने उद्देश्यले जामरको प्रयोग गरिने जनाइएको छ ।

राजावादी र गणतन्त्रवादी प्रदर्शनकारीबीच एकापसमा मुठभेड नहोस् भनेर उनीहरूका रुट फरक–फरक तय गरिएको एसएसपी खनालले बताए ।

प्रदर्शन शान्तिपूर्ण रूपमा गराउन जिल्ला सुरक्षा समितिले समेत नियमित ‘अपडेट’ जारी राखेको छ । जिल्ला सुरक्षा समितिले राजावादीलाई कार्यक्रमका निम्ति तीनकुने र गणतन्त्रवादीलाई प्रदर्शनीमार्ग (भृकुटीमण्डप)को स्थान उपलब्ध गराएको छ ।

गणतन्त्रवादीको प्रदर्शनको नेतृत्व समाजवादी मोर्चा नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपाले गरेका छन् ।

राजावादीको प्रदर्शनको नेतृत्व पूर्वपञ्च ८६ वर्षीय नवराज सुवेदीले गरेका छन् । आजको प्रदर्शनको ‘कमान्डर’ भने मेडिकल व्यवसायी दुर्गा प्रसाईंलाई तोकिएको छ ।

प्रहरी अधिकारीका अनुसार, गणतन्त्रवादीभन्दा राजावादीको प्रदर्शन अराजक हुन सक्ने आकलन गरिएको छ । उनीहरूलाई तीनकुनेबाट बानेश्वरतर्फ अघि बढ्न नदिने योजनासहित सुरक्षा टोली खटाइएको छ ।