काठमाडौं । आज आइतबार अपराह्न ४ बजे काठमाडौं आइपुगेका पूर्वराजा ज्ञानेन्द्र शाह अझै महाराजगन्जस्थित निर्मल निवास पुगेका छैनन् ।

सडकमा उत्रिएका राजावादीहरूले स्वागतका साथ उनलाई निर्मल निवासतर्फ लैजाँदै छन् ।

काठमाडौं उपत्यका ट्राफिक प्रहरी कार्यालयका प्रवक्ता एसपी सञ्जय राउतका अनुसार पूर्वराजा शाह (यो समाचार तयार पार्दा साढे ६ बजेसम्म) अमेरिकी दूतावास पुगेको बताए ।

“पूर्वराजा अमेरिकी दूतावासनजिक पुगेका छन् । ठूलो संख्यामा समर्थक उहाँसँगै छन् । चक्रपथ, महाराजगन्ज क्षेत्रको सडकमा सवारी आवागमन केही समय रोकिनेछ,” उनले बाह्रखरीसित भने ।

जिल्ला प्रहरी परिसर काठमाडौंका प्रवक्ता एसपी अपिलराज बोहोराका अनुसार अहिलेसम्म साढे १४ हजार समर्थक सडकमा उत्रिएको अनुमान छ ।

पूर्वतयारी गरेरै राजावादीहरू स्वागतका लागि आइतबार त्रिभुवन अन्तर्राष्ट्रिय विमानस्थलबाहिर पुगेका थिए ।