सिड्नी । अस्ट्रेलियन नेप्लिज जर्नालिस्ट एसोसिएसन (एञ्जा)को तेस्रो अधिवेशन सम्पन्न भएको छ । अस्ट्रेलियाको राजधानी क्यानबेरामा यही फेब्रुअरी २१ र २२ मा भएको अधिवेशनबाट अध्यक्षमा कृष्ण तिवारी निर्वाचित भएका छन् ।

४३ मताधिकार सदस्य रहेको एञ्जाको निर्वाचनमा तिवारीले २५ मत प्राप्त गरे । उनका प्रतिस्पर्धी नारायण खड्काले १८ मत पाए ।

उपाध्यक्षमा माधवप्रसाद गैरे २२ मत ल्याउँदै निर्वाचित भए । यो पदमा प्रकाश हुमागाइँले १९ र सीताकुमारी विश्वकर्माले दुई मत प्राप्त गरे ।

महासचिवमा गणेश भट्ट, कोषाध्यक्षमा खगेन्द्र सत्याल, सचिवमा तक्दिर अधिकारी, पब्लिक अफिसरमा कोम खत्री, प्रवक्तामा मिलन दाहाल सर्वसम्मत चयन भए ।

सदस्यमा सरल गुरुङ (४० मत), विनायक अधिकारी (३४ मत), गोपाल छन्त्याल (३३ मत) र केदार रायमाझी (२७ मत) निर्वाचित भएका निर्वाचनमा समितिका संयोजक राजु अधिकारीले जानकारी दिए ।

सोही अवसरमा अस्ट्रेलियामा लामो समयदेखि पत्रकारिता गर्दै आएका सरल गुरुङलाई ‘स्वर्गीय टीका कार्की सक्रिय पत्रकारिता पुरस्कार’ प्रदान गरियो । यो पुरस्कारको राशि एक हजार एक अस्ट्रेलियन डलर छ । यसअघि यो पुरस्कार सञ्चारकर्मी हेमन्त काफ्ले र ऋषि आचार्यले पाएका थिए ।