काठमाडौं । प्रधानमन्त्री केपी शर्मा ओली स्वास्थ्य समस्याका कारण प्रमुख प्रतिपक्षी दलका नेता पुष्पकमल दाहाल 'प्रचण्ड'ले संसद्लाई सम्बोधन गरेको दिन (बिहीबार)उपस्थित हुन नसकेको खुलेको छ । प्रचण्डले सम्बोधन गर्न लागेको विषय प्रधानमन्त्रीको जानकारीमा भए पनि स्वास्थ्य समस्याका कारण उपस्थित हुन नसकेको नेकपा (एमाले)का प्रमुख सचेतक महेश बर्तौलाले बताए ।

बिहीबार प्रतिनिधिसभा बैठकमा नेकपा (माओवादी) केन्द्रका अध्यक्षसमेत रहेका प्रचण्डले आफूले बोल्ने समयमा प्रधानमन्त्री उपस्थित नभएको भन्दै गुनासो गरेका थिए ।

शुक्रबार संसद् भवन परिसरमा सञ्चारकर्मीसँगको कुराकानीका क्रममा प्रमुख सचेतक बर्तौलाले प्रधानमन्त्री संसद्‌मा उपस्थित हुने तयारीमै रहँदा स्वास्थ्यमा असहजता भएपछि आउन नसकेको बताए । 

"प्रमुख प्रतिपक्षी दलका नेताले माघ २४ गतेको बैठकमा बोल्दै हुनुहुन्छ भनेर सम्बन्धित पार्टीका प्रमुख सचेतकज्यूले मलाई जानकारी गराउनुभएको थियो । यो विषय प्रधानमन्त्रीज्यूको जानकारीमा समयमै पुगेको समेत अवस्था हो । हिजो उहाँ आउने तयारीमा पनि हुनुहुन्थ्यो, तर उहाँलाई सहजता भएन । स्वास्थ्यमा समस्या भएको कारणले उहाँको हिजो कुनै पनि सार्वजनिक कार्यक्रमहरू रहेन । त्यसले गर्दा उहाँ हिजो आउन नसक्नु भएको हो । अरू कुनै कारण भएर नआउनुभएको होइन, स्वास्थ्यको असहजताले गर्द आउनुभएन," उनले भने ।

संसद्‌मा प्रधानमन्त्रीले सम्बोधन गर्दा प्रमुख प्रतिपक्षी दलका नेतालाई निम्त्याउने र प्रमुख प्रतिपक्षी दलको नेता बोल्दा प्रधानमन्त्री पनि उपस्थित रहने प्रचलन छ । तर, बिहीबार प्रतिपक्षी दल नेता बोल्दा प्रधानमन्त्री ओली प्रतिनिधिसभा बैठकमा उपस्थित थिएनन् ।