काठमाडौं । नेपाली कांग्रेसले संविधानको पालना र कार्यान्वयन, कानुन निर्माण र जनताका पक्षमा सदनमा आवाज उठाउने प्रतिबद्धता जनाएको छ । बिहीबार बसेको संसदीय दलको बैठकले संसद्को प्रभावकारितामा गम्भीर एवं जिम्मेवाररूपमा काम गर्नुपर्ने निष्कर्ष निकालेको हो ।

“नेपालको संविधानको रक्षा र संघीय लोकतान्त्रिक गणतन्त्रात्क शासन व्यवस्थाको सुदृढ गर्न संविधानको सार्थक कार्यान्वयन आजको महत्त्वपूर्ण एजेन्डा हो । नेपाली कांग्रेस सदैव लोकतन्त्र र संसदीय प्रणालीको पक्षमा रहेको छ,” कांग्रेस संसदीय दलको बिहीबारको निर्णयमा भनेको छ, “देशको सबैभन्दा ठूलो पार्टीको रूपमा स्थापित कांग्रेसले संसद्को प्रभावकारितामा गम्भीर एवं जिम्मेवाररूपमा काम गर्नुपर्छ ।”

कांग्रेसले देश र जनताका पक्षमा रहेर संसद्का गतिविधिमा प्रभावकारी उपस्थिति जनाउन सांसदहरूलाई निर्देशन दिँदै संविधान कार्यान्वयन र जनताका सवाल उठाउने प्रतिबद्धता जनाएको छ ।

“कांग्रेस संसदीय दलको यो बैठक सम्पूर्ण माननीय सदस्यहरूलाई संसद् र समितिका सम्पूर्ण गतिविधिहरूमा अत्यन्त जिम्मेवारीपूर्वक क्रियाशील रहन, राष्ट्र र जनतका हितमा पूर्णरूपमा समर्पित रही काम गर्न सोही अनुरूप विधानका कार्यमा क्रियाशील हुँदै जनताका सरोकारका विषय सदनमा उठाउने प्रतिबद्धता व्यक्त गर्दछ,” निर्णयमा भनिएको छ ।