काठमाडौं । त्रिकोणात्मक अन्तर्राष्ट्रिय महिला ट्वान्टी–२० शृंखलाअन्तर्गत नेपालले दोस्रो खेलमा थाइल्यान्डसामु जितका निम्ति १०२ रनको लक्ष्य दिएको छ ।

कीर्तिपुरस्थित त्रिवि क्रिकेट मैदानमा नेपालकी कप्तान इन्दु वर्माले टस जितेर पहिले ब्याटिङ गर्ने निर्णय लिएकी थिइन् । त्योसँगै नेपाली महिला टोलीले निर्धारित २० ओभरमा नौ विकेट गुमाएर १०१ रन बनाएको हो ।

नेपालका निम्ति कविता कुँवरले २५ रन बनाइन् । उनले ३२ बल खेल्ने क्रममा दुई चौका समेत प्रहार गरिन् । विन्दु रावलले पनि २५ रन बनाइन् । उनले २५ बलमा तीन चौका हानिन् । कप्तान इन्दु वर्माले १५ रन बनाइन् ।

बलिङतर्फ थाइल्यान्डका निम्ति थिपचा पुत्थावोंगले तीन, फन्निता माया र नाट्टाया बुचाथमले दुई/दुई तथा चानिदा सुत्थीरुआंगले एक विकेट लिए ।

थाइल्यान्डले जवाफी ब्याटिङ गरिरहेको छ ।

नेपाल पहिलो खेलमा नेदरल्यान्ड्ससँग २० रनले पराजित भएको थियो । थाइल्यान्डले भने आफ्नो पहिलो खेलमा नेदरल्यान्ड्सलाई आठ विकेटले पराजित गरेको थियो । रासस