काठमाडौं ।  जिल्ला प्रहरी कार्यालय चितवनले राष्ट्रिय स्वतन्त्र पार्टी (रास्वपा)का सभापति एवं गोर्खा मिडिया नेटवर्कका तत्कालीन प्रबन्ध निर्देशक रवि लामिछानेसहित १४ जनाविरुद्धको पूरक अभियोजनका निम्ति अनुसन्धान प्रतिवेदन बुझाएको छ ।

जिल्ला सरकारी वकिल कार्यालयमा बुझाइएको प्रतिवेदनमा लामिछानेसहित गोर्खा मिडियाका तत्कालीन सञ्चालक एवं पूर्वडीआईजी छविलाल जोशी, तत्कालीन अध्यक्ष गितेन्द्रबाबु (जीबी) राई र रामबहादुर खनालविरुद्ध संगठित अपराधमा मुद्दा चलाउनुपर्ने प्रहरीको राय छ ।

भरतपुरस्थित सहारा चितवन बहुउद्देश्यीय सहकारी संस्थाको कुल ३८ करोड नौ लाख ७९ हजार रुपैयाँ बचत अपचलन भएको प्रहरी अनुसन्धाबाट खुलेको छ ।

गएको असोज ८ गते जिल्ला सरकारी वकिल कार्यालयले बचतकर्ताको रकम हिनामिना भएको दाबीसहित चितवन जिल्ला अदालतमा मुद्दा दायर गरेको थियो । सरकारी वकिलले नेपाल राष्ट्र बैंकको निर्देशनसहितका विषयमा थप अनुसन्धान गरी पूरक अभियोजन ल्याउने प्रतिबद्धता जनाएको थियो ।

प्रतिबद्धताअनुसार लिखित रूपमा यी यी विषयमा अनुसन्धान गर्नू भन्दै जिल्ला सरकारी वकिल कार्यालयले प्रहरीलाई पत्राचार गरेको थियो । खोज्नू भनिएका सबै विषयमा अनुसन्धान नगरी प्रहरीले प्रतिवेदन बुझाएको थियो । त्यसपछि जिल्ला सरकारी वकिलले उक्त प्रतिवेदन फिर्ता पठाउँदै थप अनुसनधानका निम्ति निर्देशन दिएको थियो ।

निर्देशनबमोजिमको अनुसन्धान पूरा गरी चितवन प्रहरीले लामिछानेसहित १४ जनालाई प्रतिवादी बनाउने रायको प्रतिवेदन आइतबार (हिजो) जिल्ला सरकारी वकिल कार्यालयमा बुझाएको हो । लामिछानेसहितका प्रतिवादीबाट पाँच करोड ७९ लाख ८३ हजार रुपैयाँ दुरुपयोग भएको प्रहरी प्रतिवेदनमा उल्लेख छ ।

पूरक अभियोजनका कारण लामिछानेसहितको अभियोगमा मुद्दा चलाउन सरकारी वकिललाई हदम्यादको ‘प्रेसर’ छैन । त्यही कारण आउँदा बिदा सकाएर यही माघ २० वा २२ गते पूरक अभियोजन लैजाने तयारी रहेको जिल्ला सरकारी वकिल कार्यालय चितवनका प्रमुख शान्तिप्रसाद लुइँटेलले बाह्रखरीलाई जानकारी दिए ।