काठमाडौं । राष्ट्रिय योजना आयोगले तीनै तहका सरकारबीच सहकार्य र समन्वय गर्दै १६औँ योजनाको कार्यान्वयनलाई व्यवस्थित बनाइने जनाएको छ ।

बिहीबार काठमाडौंमा पत्रकार सम्मेलन गर्दै आयोगले १६औँ योजना समृद्ध नेपाल, सुखी नेपालीको आधारशीलामा तयार भएकाले तीनै तहका सरकारबीच सहकार्य र समन्वय गर्दै कार्यान्वयनलाई व्यवस्थित बनाइने जनाएको हो । १६औँ योजना कार्यान्वयनमा दिगो विकास लक्ष्य स्थानीयकरण र अतिकम विकसित देशबाट स्तरोन्नति हुने लक्ष्यलाई प्राथमिकतामा राखिएको आयोगका उपाध्यक्ष प्रा.डा. शिवराज अधिकारीले बताए । 

आयोगले आन्तरिक सुधारका महत्त्वपूर्ण कदम चालेको र आयोजना बैंकको व्यवस्थित र अध्यावधिक गर्न खोजिएको जनाएको छ । योजनाले  सुशासन, सामाजिक न्याय र समृद्धिलाई केन्द्रमा राख्दै आर्थिक वृद्धिलाई प्रवद्र्धन र जनताको जीवनस्तर सुधार गर्नका लागि मार्गदर्शन प्रदान गरेको उपाध्यक्ष अधिकारीले बताए । यस योजनाको प्रभावकारी कार्यान्वयनका लागि विषयगत योजनालाई क्षेत्रीय कार्यान्वयन रणनीतिमा रूपान्तरण गर्नु आवश्यक रहेको उनको भनाइ छ ।

सामाजिक न्याय र समान विकासलाई सुनिश्चित गर्न सबै वर्ग र समुदायलाई योजनाको फाइदा पु¥याउने गरी कार्यक्रमहरू निर्माण र कार्यान्वयन गरिने आयोगले जनाएको छ । राष्ट्रिय योजना आयोगले समपूरक अनुदान र विशेष अनुदानमार्फत स्रोतको वितरणमा समानतामा आधारित प्रणाली लागु गरेको जनाएको छ ।