काठमाडौं । प्रधानमन्त्री केपी शर्मा ओलीले भ्रष्टाचारको उजुरी परेको पाँच वर्षभित्र कारबाही हुनुपर्ने गरी विधेयक पारित गर्न नदिइएको बताएका छन् । ज्यापु दिवसका अवसरमा आइतबार वसन्तपुरमा आयोजित कार्यक्रममा उनले आफूहरूले भ्रष्टाचारको मुद्दामा पाँच वर्षभित्र कारबाही गरिसक्नुपर्ने आवाज उठाए पनि विधेयक पारित गर्न नदिइएको बताएका हुन् ।

भ्रष्टाचारको उजुरी परेको कहिलेसम्म कारबाही चलाउने भन्ने व्यवस्था नरहेको उनले उल्लेख गरे । यसमा ढिलोमा पाँच वर्षभित्र कारबाही गर्नैपर्ने गरी व्यवस्था गर्न लागिएकामा जननिर्वाचित प्रतिनिधिहरूबाट अस्वीकार भएको उनले बताए ।

“अस्ति ऐन एउटा हामीले बिगारेरै पास गर्नुपर्‍यो । के बिगार्नुपर्‍यो भने भ्रष्टाचारमा उजुरी परेको कहिलेसम्ममा कारबाही चलाउनैपर्ने भन्ने केही छैन,” उनले भने ।

उनले अब उजुरी अल्झाएर ५०औँ वर्षसम्म पनि मुद्दा चलाउनु नपर्ने गरी विधेयक बनाइएको सुनाए । भ्रष्टाचारको उजुरी परेपछि तत्काल कारबाही हुुनुपर्नेमा उनले जोड दिए ।

“...भ्रष्टाचारमा उजुरी परेको छ, मान्छे बुढो भइसक्यो, बितेर गइसक्यो, न सफाइ पाएको छ न कारबाही भएको छ । यस्तो हुनु हुँदैन,” उनले भने ।

उनले थपे, “पाँच वर्षमा पनि कारबाही नचलाउने, ए पाँच वर्ष छोडिदिने ? भनेर कुरा गरे । छोड्ने भनेको छैन, पाँच वर्षभित्र कम से कम कारबाही टुंग्याएको हुनुपर्छ । चलाएको हुनुपर्छ, हामीले त्यो भनेको हो । पाँच वर्ष भन्यो भनेर त्यो हटाउन बाध्य बनाए ।”

प्रधानमन्त्री ओलीले राष्ट्रिय एकता भाँड्नका निम्ति पनि हल्ला चलाइने गरेको भन्दै सचेत रहनुपर्ने बताए । सरकार देशमा सुशासन कायम गर्ने, विकासको बाटोमा लैजाने दिशामा अघि बढिरहेको उनको भनाइ थियो । न्युज एजेन्सी नेपाल