काठमाडौं । स्वतन्त्र सांसद अमरेशकुमार सिंहले सरकारी कर्मचारीलाई वर्षमा ३० दिनभन्दा बढी बिदा दिन नहुने प्रस्ताव गरेका छन् । प्रतिनिधिसभाअन्तर्गतको राज्यव्यवस्था तथा सुशासन समितिको बिहीबारको बैठकमा उनले बिदा धेरै भएको बताए ।

“५२ दिन त बिदा नै हुन्छ । अरू बिदा धेरै भयो,” उनले भने, “वर्षमा ३० दिनभन्दा बढी बिदा नपाउने व्यवस्था गरौँ ।”

संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकमाथिको छलफलका क्रममा उनले ट्रेड युनियनले मन्त्रीको आडमा सचिव र उपसचिवको हुर्मत लिने काम गरेको आरोप पनि लगाए । “ट्रेड युनियनको कन्सेप्ट निजी क्षेत्रको लागि आएको हो,” उनले भने ।

कुनै कर्मचारी सिंहदरबारमा पाँच वर्षभन्दा बढी बस्न नपाउने व्यवस्था गरिनुपर्नेमा उनले जोड दिए । “चाकडी प्रथाबाट कर्मचारी प्रशासनलाई मुक्त गरौँ,” उनले भने ।