काठमाडौं । प्रधानमन्त्री केपी शर्मा ओलीले देश चलाउन सहकारी ठगेजस्तो नहुने टिप्पणी गरेका छन् । आइतबार झापाको दमकमा आयोजित एक कार्यक्रममा प्रधानमन्त्री ओलीले रवि लामिछानेप्रति लक्षित गर्दै देश चलाउन सहकारी ठगेको जस्तो नहुने बताएका हुन् ।

उनले देश चलाउन सिद्धान्त, नीति, संकल्प र अठोट चाहिने बताए । उनले नयाँ राजनीतिक शक्तिहरूलाई बाँसको झ्याङमा उम्रिएको नर्कटको संज्ञा दिए ।

"कहिले कहिले यस्तो लाग्छ, बाँसको झ्याङको छेउमा एउटा नर्कट उम्रिन्छ । बाँसको टुसोभन्दा छिटो बढ्छ । बाँस अलि यत्रो हुँदा नर्कट अलि ठूलो भइसक्छ । अर्कोपल्ट हेर्न जाँदा नर्कट बुढो भएर ढलिसकेको हुन्छ । नयाँ नर्कट त्यस्तै हो, यी नर्कटहरू पुर्लक्क उम्रिन्छन्, अलि यत्रा हुन्छन् फेरि ढल्छन्," उनले भने ।

देश चलाउन अरूलाई मुख छोडेजस्तो नहुने पनि बताए । "कोही भ्रममा नपरे हुन्छ, देश चलाउन सिद्धान्त चाहिन्छ, नीति चाहिन्छ, संकल्प चाहिन्छ, अठोट चाहिन्छ, सहकारी ठगेजस्तो हुँदैन । अरूलाई बुरुकबुरुक उफ्रिएर मुख छोडेजस्तो हुँदैन, देश चलाउनलाई," उनले भने ।