काठमाडौं । नेपाल क्रिकेट संघ (क्यान)ले नेपाल प्रिमियर लिग (एनपीएल)को शनिबार हुने खेलका टिकट नहुनेलाई घरमै बसेर खेल हेर्न आग्रह गरेको छ ।

क्यानले शुक्रबार एक विज्ञप्ति जारी गर्दै शनिबार हुने खेलका निम्ति इ–पे वालेट खल्तीमा सीमित टिकट बिक्री हुने भएकाले टिकट नहुनेलाई घरमै बसेर खेल हेर्न आग्रह समेत गरेको छ ।

“नेपाल प्रिमियर लिगमा शनिबारका लागि खल्तीमार्फत मात्र सीमित टिकट उपलब्ध छन् । भौतिक रूपमा कुनै पनि टिकट बिक्री हुने छैन । खल्ती एपमा टिकट सोल्ड आउट भएपछि तपाईंको सुरक्षाका लागि घरमै बसेर खेलको प्रत्यक्ष प्रसारण हेर्नुहोला,” विज्ञप्तिमा उल्लेख छ ।

प्रतियोगितामा शनिबार दुई खेलहरु हुँदैछन् । शनिबारको पहिलो खेलमा लुम्बिनी लायन्स र सुदूरपश्चिम रोयल्सबीच प्रतिस्पर्धा हुनेछ । यस्तै, दोस्रो खेलमा कर्णाली याक्स र विराटनगर किंग्सबीच प्रतिस्पर्धा हुने तालिका छ ।