काठमाडौं । रुसले युक्रेनमा १२० मिसाइल र ९० ड्रोनसहित ठूलो हमला गरेको छ । रुसी आक्रमणमा युक्रेनको पावर सिस्टमलाई निशाना बनाइएको थियो । धेरै बिजुली प्लान्ट र ट्रान्सफर्मर नराम्ररी क्षतिग्रस्त भएको छ । त्यसपछि युक्रेनमा विद्युत कटौती घोषणा गरिएको छ ।

बिजुली पूर्वाधार मर्मत गर्न युक्रेनको राज्य पावर अपरेटर युक्रेनर्गोले सोमबार बिहान ६ बजेदेखि राति १० बजेसम्म बिजुली कटौतीको घोषणा गरेको थियो ।

युक्रेनी राष्ट्रपति भ्लोदोमिर जेलेन्स्कीले रुसी मिसाइलले युक्रेनको नौतले आवासीय भवनमा प्रहार गरेको बताएका छन् । जसमा बालबालिकासहित १० जनाको मृत्यु भएको बीबीसीले जनाएको छ ।

आक्रमणमा ब्यालेस्टिक मिसाइल, क्रुज मिसाइल र ड्रोनले युक्रेनको राजधानी किभ, डोनेस्क, ल्भिभ, ओडेसालगायतका धेरै भागलाई निशाना बनाइएको थियो । प्रतिरक्षमा युक्रेनले १४० रुसी मिसाइल र ड्रोनहरू खसालेको जनाइएको छ ।

रुसले युक्रेनमा आक्रमण गरेपछि अमेरिकाले युक्रेनलाई लामो दुरीको मिसाइल प्रयोग गर्न अनुमति दिएको छ । न्युयोर्क टाइम्सले अमेरिकी अधिकारीहरूलाई उद्धृत गर्दै युक्रेनलाई आर्मी टेक्टिकल मिसाइल प्रणाली (एटीएसीएमएस) प्रयोग गर्न अनुमति दिएको पुष्टि गरेको छ । यस क्षेप्यास्त्रले ३०० किलोमिटरसम्मको लक्ष्यमा प्रहार गर्न सक्छ ।