काठमाडौं । नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले स्व. दमननाथ ढुंगानाले शान्ति सम्झौता र संविधानसभाको वातावरण बनाउन अविष्मरणीय योगदान गरेको बताएका छन् । सोमबार पूर्वसभामुख ढुंगानालाई अन्तिम श्रद्धाञ्जली दिन सानोगौचरण पुगेका उनले यस्तो बताएका हुन् ।

उनले स्व. ढुंगानालाई नेपालको लोकतान्त्रिक आन्दोलनको एउटा ऐतिहासिक व्यक्तित्वका रूपमा नेपाली जनताले सधैँ सम्झिरहने बताए । ढुंगाना र पद्यरत्न तुलाधरले शान्ति सम्झौता र संविधानसभाको वातावरण बनाउन र देशलाई लोकतान्त्रिक गणतन्त्रमा ल्याउन खेलेको भूमिका अविष्मरणीय रहेको उनले उल्लेख गरे ।

“आदरणीय दमननाथ ढुंगाना नेपालको लोकतान्त्रिक आन्दोलनको एउटा ऐतिहासिक व्यक्तित्वको रूपमा नेपाली जनताले सधैँ सम्झिराख्नेछन्,” उनले भने, “उहाँप्रति श्रद्धाञ्जली व्यक्त गर्दै गर्दा शोकाकुल परिवारजन र आफन्तजनप्रति समवेदना प्रकट गर्दछु ।”

उनले अगाडि भने, “शान्ति सम्झौताको तयारीको क्रममा उहाँसँग विशेष सम्बन्ध भयो ।” न्युज एजेन्सी नेपाल