काठमाडौं । इजरायलमा कार्यरत केही नेपालीले हुन्डीमार्फत नेपालमा पैसा पठाएकामा त्यहाँस्थित नेपाली दूतावासले चिन्ता व्यक्त गरेको छ ।

“नेपालमा आफ्नो कमाइ पठाउन वैधानिक माध्यमहरू ग्लोबल रेमिट/वर्ल्डकम फाइनान्स/जीएमटी/बैंकजस्ता वित्तीय माध्यम हुँदा हुँदै केही अवैधानिक माध्यमहरू हुन्डी/सापटी/ढुकुटीजस्ता तरिकाहरूको अत्यधिक प्रयोग भएको भन्ने सुन्नमा आएकोले यस राजदूतावास चिन्तित छ,” इजरायलको तेल अभिभस्थित नेपाली दूतावासले आइतबार एक सूचना जारी गर्दै भनेको छ ।

इजरायलमा रोजगार गरी बसेका नेपाली समुदायलाई परिश्रमको कमाइ वैधानिक माध्यमबाट आफ्नो देशमा पठाई विभिन्न खाले जोखिमबाट टाढा रहन दूतावासले अनुरोध गरेको छ । “हुन्डी कारोबारहरूबाट सिर्जित व्यक्तिगत लेनदेनका विषयहरूमा दूतावासमा नियमितजस्तो गुनासाहरू आइरहेको हुँदा कुनै पनि बिचौलियाहरूको मिठो बोली र क्षणिक विश्वासमा नपर्न हुन सबै प्रवासी नेपालीहरूमा यस राजदूतावास विशेष अनुरोध गर्दछ,” दूतावासले भनेको छ ।