काठमाडौं । प्रधानमन्त्री केपी शर्मा ओलीको चीन भ्रमणअगाडि भारतीय सेना प्रमुख जनरल उपेन्द्र द्विवेदी र भारतीय सशस्त्र सीमा बलका महानिर्देशक अमृत मोहन प्रसाद नेपाल आउने भएका छन् । 

“भारतीय सेना प्रमुख नेपाल आउँदै हुनुहुन्छ । हालसम्म तय भएको कार्यक्रमअनुसार उहाँ मंसिर ५ देखि ९ गतेसम्म (पाँच दिन) नेपालको भ्रमण गर्नु हुनेछ,” नेपाली सेनाका प्रवक्ता सहायक रथी गौरवकुमार केसीले विगत सात दशकदेखि नेपाल र भारत दुवै देशका सेनाबीच एक अर्काको सेना प्रमुखलाई मानार्थ महारथी दर्जा प्रदान गर्ने परम्परा रहीआएको छ । 

यसैअनुसार भारतीय सेना प्रमुख द्विवेदी नेपाली सेनाको मानार्थ महारथी पदको सम्मान लिन नेपाल आउन लागेका हुन् । 

“नेपाल आएको भोलिपल्ट (मंसिर ६)मा राष्ट्रपतिज्यूले भारतीय सेना प्रमुखलाई नेपाली सेनाको मानार्थ महारथी पदबाट सम्मान गर्ने कार्यक्रम छ,” सैनिक प्रवक्ता केसीले भने । 

राष्ट्रपति कार्यालय शीतलनिवासमा विशेष कार्यक्रमको आयोजना गरी भारतीय सेना प्रमुखलाई नेपाली सेनाको मानार्थ महारथी पदबाट सम्मानित गरिनेछ । 

नेपाल भ्रमणका बेला भारतीय सेना प्रमुख द्विवेदीले नेपाली सेनाका प्रधानसेनापति अशोकराज सिग्देलसँग द्विपक्षीय वार्ता गर्नेछन् । उनले राष्ट्रपति रामचन्द्र पौडेल र प्रधानमन्त्री केपी शर्मा ओलीसँग पनि शिष्टाचार भेटवार्ता गर्नेछन् । 

नेपाल आएको बेला भारतीय सेना प्रमुखले काठमाडौं बाहिरका एक–दुई ठाउँको भ्रमण गर्ने तयारी भइरहेको छ । यसअघि भारतीय सेना प्रमुख नेपाल आउँदा सगरमाथा क्षेत्र, लुम्बिनी, मुक्तिनाथ जस्ता स्थानको भ्रमण गर्ने गरेका थिए । 

द्विवेदीले २०२४ जुन ३० देखि भारतीय सेना प्रमुखको जिम्मेवारी सम्हालेका हुन् । सेना प्रमुख भएपछि द्विवेदी पहिलोपटक नेपाल आउन लागेका हुन् । 

यस्तै, भारतको सशस्त्र सीमा बल (एसएसबी)का महानिर्देशक अमृत मोहन प्रसाद कात्तिक ३० गते नेपाल आउँदै छन् । सशस्त्र प्रहरी बल, नेपालका महानिरीक्षक राजु अर्यालको निमन्त्रणमा प्रसाद नेपाल आउन लागेका हुन् ।

नेपाल–भारत सीमा सुरक्षाका सम्बन्धमा सशस्त्र प्रहरी बल र एसएसबीच प्रत्येक वर्ष हुने वार्षिक समन्वय बैठकमा सहभागी हुन प्रसाद नेपाल आउन लागेका हुन् । 

बैठक मंसिर १ र २ गते काठमाडौंमा बस्नेछ । सीमा सुरक्षालाई लिएर सशस्त्र प्रहरी बल र एसएसबीच हुन लागेको यो आठौँ वार्षिक बैठक हो । 

भारतीय दुवै सुरक्षा निकायका प्रमुख प्रधानमन्त्री केपी शर्मा ओलीको चीन भ्रमणअगाडि नेपाल आउन लागेका हुन् । प्रधानमन्त्री ओलीले मंसिर १७ देखि २१ सम्म चीनको औपचारिक भ्रमण गर्ने तयारी भइरहेको छ ।