काठमाडौं । उपनिर्वाचन हुँदै गरेको एकमात्रै नगरपालिका हो, कीर्तिपुर । काठमाडौंको कीर्तिपुर नगरपालिकाको मेयर पदका निम्ति हुने उपनिर्वाचनलाई चासोका साथ हेरिएको छ ।

आगामी मंसिर १६ गते कीर्तिपुरसहित एक नगरपालिका उपप्रमुख, दुई गाउँपालिका अध्यक्ष, चार उपाध्यक्ष र वडाध्यक्ष पदमा चुनाव हुने तय भएको छ । सबै पदका लागि दलहरूले उमेदवार छान्ने गृहकार्य गरिरहेका छन् ।

०७९ को स्थानीय निर्वाचनमा कीर्तिपुर नगरपालिका नेपाली कांग्रेसले जितेको थियो । नगरप्रमुख राजकुमार नकर्मीको ०८१ साउन १० गते निधन भएको थियो । मृगौलाको रोगबाट पीडित नकर्मीको उपचारका कममा निधन भएपछि रिक्त स्थानमा उपनिर्वाचन हुन लागेको हो ।

एमालेले मानन्धरलाई उमेदवार बनाउने, माओवादीले दोहोर्‍याउँदै 

उपनिर्वाचनका निम्ति मंसिर २ गते उमेदवारी दर्ता हुँदै छ । दलहरूले धमाधम उमेदवार छनोटको गृहकार्य गरिरहेका छन् ।

उपनिर्वाचनका लागि नेकपा (एमाले)ले सुरेन्द्र मानन्धरलाई उमेदवार बनाउने भएको छ । एमालेको कीर्तिपुर नगर कमिटीले मानन्धरको नाम सर्वसम्मत सिफारिस गरेको हो ।

उता, नेकपा (माओवादी केन्द्र)ले ०७९ को स्थानीय तह चुनावमा पराजित शिवशरण महर्जनलाई नै दोहोर्‍याउने भएको छ । 

पार्टीका उपाध्यक्ष तथा वाग्मती प्रदेश इन्चार्ज अग्नि सापकोटासहित बसेको नगरसमितिको सोमबारको बैठकले महर्जनलाई उमेदवार बनाउने सर्वसम्मत निर्णय गरेको छ । 

त्यस्तै, राप्रपाले इन्जिनियर ध्रुव महर्जनलाई उमेदवार बनाउने घोषणा गरिसकेको छ । 

कांग्रेसमा ११ आकांक्षी, नकर्मीर्की श्रीमतीको नाम पनि सिफारिस
 
नगरपालिकाको मेयरको उमेदवारका लागि नेपाली कांग्रेसमा ११ आकांक्षी देखिएका छन् । उपनिर्वाचनका निम्ति ११ जनाले आकांक्षा राखेका हुन् । कांग्रेसको नगर समितिले ती नाम क्षेत्रीय समितिमा पठाएको छ । 

क्षेत्रीय समितिले आज जिल्लालाई सिफारिस गर्न लागेको हो । विधानतः तीन जनाको नाम सिफारिस गर्नुपर्ने भए पनि ११ जनाको नाम आइपुगेको क्षेत्रीय सभापति पुकार महर्जनले बताए । 

“विधानतः एक महिला रहने गरी तीन जनाको नाम सिफारिस गर्नुपर्ने हो । तर, नगर समितिले सुरुमा लगातार तीनजना पुरुषको नाम राखेर सिफारिस गरेको छ,” उनले बाह्रखरीसँग भने, “हामीले कारणसहित जिल्लालाई आज सिफारिस गर्दै छौँ ।”

सिफारिसमा नगर सभापति कृष्णमान डंगोलको नाम पहिलो नम्बरमा छ । त्यसपछि बद्रीलाल महर्जन, हिमाल कार्की, जमुना नकर्मी, संगीत बोगटी, सशीर महर्जन, राममान सिंह, जनकलाल महर्जन, किरण केसी, मीनप्रकाश महर्जन र सचिन्द्र महर्जनको नाम राखिएको छ । 

चाौँथो नम्बर सिफारिस भएकी जमुना नकर्मी यसअघिका मेयर नकर्मीकी श्रीमती हुन् । 

रास्वपाले कसलाई उमेदवार बनाउँछ ? 

राष्ट्रिय स्वतन्त्र पार्टी (रास्वपा) ०७९ को स्थानीय तहको निर्वाचन हुँदा स्थापना नै भएको थिएन । प्रदेशको चुनाव नलड्ने घोषणा गरेको रास्वपाले उपनिर्वाचन लड्ने निर्णय केन्द्रीय समितिबाट गरिसकेको छ । 

रास्वपाको केन्द्रीय समितिले सहमहामन्त्री विपीन आचार्य संयोजक रहेको उपनिर्वाचन संयोजन समिति बनाएको थियो । तर, उनले केन्द्रीय समितिलाई नै जिम्मा दिएपछि सांसद गणेश पराजुलीको नेतृत्वमा उपनिर्वाचन संयोजन समिति बनाइएको छ । उक्त समितिले उपनिर्वाचनको तयारी थालेको छ ।

“स्थानीय तहका संयन्त्रलाई नै जिम्मेवार बनाएर काम गर्दै छौँ । आज जुम बैठक राखिएको छ, भोलि पनि बैठक बस्छौँ । उमेदवारी आह्वान कसरी गर्ने भन्ने तय हुन्छ,” पराजुलीले भने । 

उनका अनुसार, उमेदवार सिफारिस गर्ने भन्दा पनि एक भन्दा बढी उमेदवार भएमा आन्तरिक निर्वाचन गरेर उमेदवार छान्नेसम्मको तयारी भएको छ । कात्तिक २९ गतेसम्म उमेदवार तय गर्ने गरी काम गरिरहेको उनले बताए ।

कार्यवाहक प्रवक्ता मनिष झाले कीर्तिपुरको उपनिर्वाचनलाई प्राथमिकतामा राखिएको बताए । “संघीय निर्वाचनमा रास्वपाले राम्रो मत पाएको पालिकाको उपनिर्वाचनलाई प्राथमिकतामा राख्छौँ । योग्य, प्रतिष्ठित व्यक्तिलाई उमेदवार बनाउँछौँ,” उनले बाह्रखरीसँग भने ।

प्रतिनिधिसभाको निर्वाचनमा काठमाडौं–१० बाट रास्वपाले काठमाडौं जिल्ला सभापति प्रदीप विष्टलाई उमेदवार बनाएको थियो । उनी आठ हजार ७४३ मत ल्याएर पराजित भएका थिए ।

रास्वपा स्रोतका अनुसार, विष्टलाई नै मेयरको उमेदवार बनाउने तयारी भएको छ । “उहाँले प्रतिनिधिसभाको निर्वाचनमा कीर्तिपुर नगरपालिकामा कांग्रेसको भन्दा ११ सय बढी मत ल्याउनुभएको थियो । उहाँलाई नै उमेदवार बनाउने सम्भावना छ,” रास्वपा स्रोतले भन्यो । 

स्थानीय चुनावमा कसले कति मत पाएका थिए ?

०७९ को स्थानीय तहको निर्वाचनमा मेयरमा निर्वाचित नकर्मीले नौ हजार ४३ मत प्राप्त गरेका थिए । उनका निकटतम प्रतिष्पर्धी एमालेका केशवरत्न बज्राचार्यले पाँच हजार ५०७ मत ल्याएका थिए । 

माओवादीका शिवशरण महर्जनले चारहजार ९०, एकीकृत समाजवादीका बटुकृष्ण थापाले एकहजार १५३ मत ल्याएका थिए ।

राप्रपाका जितबहादुर विष्टले ५७२, नेमकिपाका श्रीकृष्ण महर्जनले ५३२, स्वतन्त्र उमेदवार मनोज बुढाथोकीले ३६५, नेपाली कांग्रेस (बीपी)का प्रविद् खनालले ८१ मत प्राप्त गरेका थिए ।

त्यस्तै, आमूल परिवर्तन मसिहा पार्टीका उमेदवार श्यामकाजी महर्जनले २१, स्वतन्त्र भीमकुमार महर्जनले १३ मत ल्याएका थिए ।