काठमाडौं । नेपालमा जारी साफ महिला च्याम्पियनसिपमा माल्दिभ्सले खराब कीर्तिमान बनाएको छ । माल्दिभ्स साफको सातौँ संस्करणमा गोल नगर्ने एकमात्र टिम बन्दै प्रतियोगिताबाट बाहिरिएको छ ।

माल्दिभ्स प्रतियोगिताको समूह ‘बी’मा थियो । यस समूहमा माल्दिभ्ससँगै नेपाल, भुटान र श्रीलंका थिए ।

माल्दिभ्सले प्रतियोगिताका तीन खेलमा २५ गोल बेहोर्‍यो । माल्दिभ्सले प्रतियोगिताको पहिलो खेलमा श्रीलंकासँग १–० को हार बेहोरेको थियो । दोस्रो खेलमा नेपालसँग ११–० ले पराजित भएको माल्दिभ्स समूह चरणको अन्तिम खेलमा भुटानसँग १३–० ले पराजित भएको थियो । भुटानसँगको यो नतिजा जारी संस्करणकै सबैभन्दा फराकिलो हार हो ।

जारी सिजन गोलविहीन बनेको माल्दिभ्सले सन् २०१९ को संस्करणयता जित निकाल्नसमेत सकेको छैन । माल्दिभ्सले पछिल्लोपटक सन् २०१६ को संस्करणमा जित निकालेको थियो । उक्त संस्करणमा माल्दिभ्स समूह चरणमा श्रीलंकालाई ५–२ ले र भुटानलाई ३–१ ले पराजित गरेको थियो ।

त्यसयता जितविहीन माल्दिभ्सले सन् २०१९ को संस्करणमा भारतसँग ६–० को र श्रीलंकासँग २–० को हार बेहोरेको थियो । यस्तै, २०२२ को संस्करणमा पनि माल्दिभ्स समूह चरणबाटै बाहिरिँदा बंगलादेशसँग ३–० ले, पाकिस्तानसँग ७–० ले र भारतसँग ९–० ले पराजित भएको थियो ।