पोखरा । लागुऔषध मुद्दामा पक्राउ परेका पूर्वसांसद ढाकाकुमार श्रेष्ठ ७५ हजार धरौटीमा रिहा भएका छन् । राष्ट्रिय स्वतन्त्र पार्टी (रास्वपा)बाट सांसद बनेका उनलाई औषधिजन्य लागुऔषध बिक्री वितरण गरेको आरोपमा कास्की प्रहरीले भदौ २७ गते पक्राउ गरेको थियो ।

बिहीबार जिल्ला अदालत कास्कीका न्यायाधीश भोलानाथ ढकालको इजालसले श्रेष्ठलाई धरौटीमा छोड्न आदेश दिएको हो ।

अदालतका सूचना अधिकारी सुरज अधिकारीका अनुसार, उनी धरौटी बुझाएर रिहा भइसकेका छन् ।

श्रेष्ठले पोखराको पृथ्वीचोकमा दिया फार्मेसी सञ्चालन गर्दै आएका छन् । कास्कीको पोखरा महानगरपालिका–२ बाग्लुङ बसपार्कमा ट्रुपेनन (टपान्टाडोल) नामक ९७ पिस ट्याब्लेटसहित पक्राउ परेका प्रकाश थापामगरको बयानका आधारमा प्रहरीले श्रेष्ठलाई पक्राउ गरेको थियो । रोल्पाको त्रिवेणी गाउँपालिका–७ घर भएका थापामगरले उक्त ट्याब्लेट श्रेष्ठ सञ्चालक रहेको पोखराको पृथ्वीचोकस्थित दिया फार्मेसीबाट खरिद गरी ल्याएको बयान दिएका थिए । उक्त ट्याब्लेट डाक्टरको प्रेस्क्रिप्सनबिना बिक्री–वितरण गर्न पाइँदैन ।

एक व्यापारीसँग दुई करोड रुपैयाँ माग गरेको अडियो सार्वजनिक भएपछि रास्वपाले श्रेष्ठलाई कारबाही गरेको थियो । उनले सांसद पदसँगै रास्वपाको साधारण सदस्यता समेत गुमाएका थिए ।