काठमाडौं । नेकपा (माओवादी केन्द्र)का सांसद हितबहादुर तामाङले सरकारले वरीयताक्रम मिचेर मुख्यसचिव नियुक्त गरेका कारण सचिवहरू आतंकित भएका बताएका छन् ।

सोमबार प्रतिनिधिसभा बैठकको विशेष समयमा उनले सरकारको मुख्य काम थिति बसाल्ने र कानुन कार्यान्वयन गर्ने भए पनि त्यसो हुन नसकेको उल्लेख गरे । उनले अरू नियुक्तिमा पनि वरीयताक्रम मिच्ने काम गरिएको बताए ।

प्रधानमन्त्रीको तहबाट निरंकुशता लाद्ने खालका निर्णय भइरहेका उनले आरोप लगाए । उनले मुलुकमा सबैतिर बेथिति र अराजकता बढेको बताए ।

जनताको अधिकार कुण्ठित गरेर संविधान संशोधन गर्न माओवादी केन्द्रले नदिने उनले उल्लेख गरे । कार्यकारी अधिकारसहित प्रत्यक्ष निर्वाचित राष्ट्रपतिको व्यवस्था र पूर्ण समानुपातिक निर्वाचन प्रणाली राख्ने गरी संविधान संशोधन गरिने भए आफूहरू तयार रहेको उनले बताए ।

प्रतिनिधिसभा बैठकमा सांसद हितबहादुर तामाङको भनाइ पढ्नोस्–
सरकारले गर्नुपर्ने मुख्य कुराहरू के हुन् ? थिति बसाल्ने कुरा हो । कानुनको कार्यान्वयन गर्ने कुरा हो । तर, मुख्यसचिव बनाउँदाखेरि वरीयताक्रम मिच्ने काम गर्‍यो । जसको कारणले गर्दा अरू सचिवहरूले आतंकित हुनुपर्ने, राजीनामा दिनुपर्ने खालका कुराहरू आए । हिजो मात्रै खेलकुद परिषद्अन्तर्गत खेलकुद विभागमा वरीयताक्रम मिचेर नियुक्ति गरेको कारणले वरिष्ठ खेलाडी, ओलम्पियन संगीता वैद्यले राजीनामा दिएको कुरा बाहिर आइरहेका छन् । मुलुकमा सबैतिर बेथिति नै बेथिति छ । अराजकता नै अराजकता छ । प्रधानमन्त्रीको तहबाट निरंकुशता लाद्ने खालका निर्णयहरू भइराखेका छन् । यसतर्फ सरकारको ध्यानाकर्षण गराउन चाहन्छु । न्युज एजेन्सी नेपाल