काठमाडौं । महालक्ष्मी विकास बैंक र राउन्ड टेबल नेपालबीच बैंकबाट दैनिक रूपमा निस्कने डिस्पोजेबल कागज उचित रूपमा विसर्जन गर्ने सम्बन्धमा सहकार्यको सुरुआत भएको छ । पुराना कागज नष्ट गर्ने कार्यलाई निरुत्साहित गर्न सचेतना अभिवृद्धि गर्ने तथा पुनः प्रयोग र पुनः प्रशोधनमार्फत वातावरण संरक्षण गर्दै सामाजिक रूपमा पिछडिएका विधार्थीको शौक्षिक विकास गर्ने मूल उद्देश्यका साथ सहकार्य गरिएको हो ।

सहकार्यअन्तर्गत राउन्ड टेबल नेपालले महालक्ष्मी विकास बैंकका विभिन्न कार्यालयमा रहेका डिस्पोजेबल कागज संकलन गर्नेछ । यसरी संकलित कागज राउन्ड टेबल नेपाल र महालक्ष्मी विकास बैंकको प्रत्यक्ष निगरानीमा तोकिएका कागज उत्पादक कम्पनीलाई पुनः प्रशोधनका निम्ति दिइने र त्यसबापत प्राप्त रकम गरिब तथा असहाय विधार्थीको शिक्षामा पहुँच विस्तार गर्दै शैक्षिक विकासका निम्ति खर्च गरिनेछ ।

यसबाट बैंकले गर्दै आएको संस्थागत सामाजिक उत्तरदायित्व कार्य तथा राउन्ड टेबल नेपालको ‘बालबालिकालाई शिक्षित गरौँ’ भन्ने परियोजनामा थप टेवा पुग्ने विश्वास दुवै संस्थाले लिएका छन् ।

बैंकको देशभर १०३ शाखा कार्यालय र करिब आठ लाख ग्राहक छन् ।