भोजपुर । इच्छाशक्ति भएमा उमेरले नछेक्ने उदाहरण बनेका छन्, भोजपुर नगरपालिका–११, आम्तेकका धनबहादुर राई । उमेरले ७९ वर्ष पुगेका राई बाँसको सिन्का बनाएर भोजपुर बजारसम्म बिक्रीका निम्ति ल्याउने गर्छन् ।

धनबहादुरले भने, “विगतमा १० देखि २० रुपैयाँ मुठाका दरले सिन्का बेच्ने गरेको थिएँ । अहिले भने १२० सम्ममा बिक्री गर्दै आइरहेको छु ।”

सिन्का बनाउन धेरै समय र मिहिनेत लाग्ने गरेको उनले बताए । उनले भने, “८० वर्ष पुग्न लाग्दा पनि पुरानो पेसा गरिरहेको छु । बजारमा ल्याएको सिन्का सबैले किन्ने गरेका छन् । धैरेले त तराईतिर लान पनि ल्याइदिनु है बाजे पनि भन्छन् ।”

आफ्नै घरनजिक बाँसको झ्याङ रहेको र अरूबाट किन्नु नपर्ने भएकाले पनि आफूहरू सानैदेखि यो पेसामा लागेको धनबहादुरले सुनाए । उनले भने, “अहिले त खालि युवाहरू विदेश जान तम्सिन्छन् । तर, जोसजाँगर भए त गाउँघरमै पनि त्यत्तिकै त बस्नु पर्दैन ।”

घरबाट १६ मुठा सिन्का लिएर सदरमुकाम आएका उनले केही समयमा नै ती बिक्री गरिसकेको बताए । उनले ती सिन्का बिक्रीबाट एक हजार ५०० रुपैयाँभन्दा बढी पैसा कमाएको उल्लेख गरे ।

राईले सिन्का बिक्रीबाट घरका निम्ति नुन, तेल किन्न सहज भएको बताए । यस्तो काममा अहिलेका युवाले चासो नदेखाउँदा अबका दिनमा सिन्का पाउन मुस्किल हुने उनको भनाइ छ ।

उनले भने, “अहिलेसम्म त भनेकाहरूलाई मैले सिन्का ल्याइदिएको छु, अब मैले छाडेपछि समस्या हुन्छ । त्यसपछि धार्मिक कार्यमा प्रयोग हुने दुनाटपरी कसरी बनाउने ?” रासस