काठमाडौं । धितोपत्र दोस्रो बजारमा सेयर कारोबार गर्नेहरू अहिले अत्तालिएका छन् । यसअघि, ०७८ भदौ २ गतेको उच्च विन्दु ३,१९८ लाई पार गर्ने विश्वासका साथ बसेका केही लगानीकर्ता अहिले दोधारमा छन् । केही दिनदेखि बजार दैनिक उच्च अंकले घट्ने र झिनो अंकले बढ्ने गरेको छ । 

कतिपयले अहिलेको बजार घटाइ ‘नाडा अटो सो’सँग जोडिएको कारण देखाएका छन् । हुन पनि ‘नाडा अटो सो’सुरु हुनुभन्दा केही दिन अघिदेखि बजारमा उतारचढाव देखिएको थियो । करिब दुई महिनाको अवधिमा ५० प्रतिशतसम्म नाफा आर्जन गरेपछि नयाँ गाडी किन्नका लागि सेयर बेच्न थालेको हुन सक्ने अनुमान सेयर विश्लेषकहरू पनि गर्न थालेका छन् । 

ठूलो परिमाणको लगानी सेयर बजारमा गर्नेले केही दिनमै उच्च प्रतिफल पाउन सफल भएका छन् । यही मौकामा नाफाबाट आफूले चाहेको गाडी खरिद गर्नतर्फ सेयर लगानीकर्ता लागेको हुन सक्ने सेयर विश्लेषक सुवाशचन्द्रढुंगाना बताउँछन् । अहिले बजारमा बिक्री चाप बढ्नुलाई ‘नाडा अटो सो’लाई एउटा कारणका रूपमा लिन सकिने उनको भनाइ छ । 

पछिल्लो ४१ करोबार दिनमा बजार ४७.३०८ प्रतिशतले बढेर ८.३७२ प्रतिशतले घटेको छ । नेप्से परिसूचक असार १६ गतेयता ३४ कारोबार दिनमा २,०३७.०९ विन्दुबाट ३,०००.८१विन्दुसम्म पुगेको थियो । उक्त अवधिमा बजार ९६३.७२अंकले उकालो लागेको थियो । तर, साउन ३१ गतेपछि बजार ३,०००.८१ विन्दुबाट घटेर भदौ १३ गतेसम्म २,७४९.५७ विन्दुमा झरेको छ ।

पछिल्ला सात कारोबार दिनमा बजार १८२.०८अंक घटेको छ । उक्त अवधिमा बजार ११ अंकले मात्र बढेको छ । बजार बढ्न थाल्दाको पहिलो सात कारोबार दिनमा ६ कारोबार दिनको अवधिमा ११९.६७अंकले बजार उकालो लागेको थियो भने एक कारोबार दिनमात्र ४.६२अंकले घटेको थियो ।

छोटो समयमा बजार उच्च विन्दुमा पुगेपछि लगानीकर्ताले नाफा बुक गरेको हुन सक्ने सेयर विश्लेषक ढुंगानाको भनाइ छ । अहिले सर्ट ट्रमका लगानीकर्ताका कारण बजारमा करेक्सन आएको उनी बताउँछन् । २,६३० विन्दुसम्मलाई उनले करेक्सन विन्दु मानेका छन् । २,८८० विन्दुमाथि बजार लाग्यो भने करेक्सन सकिएको मानिने उनको भनाइ छ ।

“अब बजार फर्केर २,९०० देखि २,९५० विन्दुसम्म गयो भने  त्यहाँभन्दा माथि जान सकेन र त्यहीँबाट निरन्तर करेक्सन भयो भने त्यो गिरावट चाहिँ ठूलो हुन्छ,” ढुंगानाले भने, “माथि जाँदा ३,०५० लाई ब्रेक नै गर्ने गरी जानुपर्‍यो । त्यो गर्‍यो भने ३,२०० विन्दुमाथि बजार टिक्न सक्छ ।”

पछिल्लो दिनमा कारोबार रकममा पनि कमी आएको छ । साउन ३१ गते हालसम्मकै उच्च मूल्यको सेयर कारोबार भएको थियो । उक्त दिन २९ अर्ब ९५ करोड ८५ लाख रुपैयाँको सेयर करोबार भएको थियो । त्यसपछिका दिनहरूका कारोबार रकम घट्दै आएको छ ।

बिहीबार कारोबार रकम घटेर १२ अर्ब २४ करोड ३६ लाख रुपैयाँमा झरेको छ । कारोबार रकम एक्कासि बढेकाले पनि अहिलेको १२–१३ अर्ब कम जस्तो लागेको ढुंगाना बताउँछन् । तर, कारोबार रकम १० अर्बभन्दा कम दैनिक चार–पाँच दिन भयो भने चाहिँ बजारबाट पैसा निस्किएर अन्तै गायो भनेर बुझ्न सकिने उनको भनाइ छ । तर, बजार बढ्दै जाँदा कारोबार रकम पनि बढ्दै जाने उनको भनाइ छ । 

छोटो समयका लागि बजारमा लगानी गरेका व्यापारीहरूले पैसा झिक्दा पनि केही असर परेको कतिपयको बुझाइ छ । 

तर, बैंकहरूले ब्याजदर घटाएको र राष्ट्र बैंकले पनि बैंकहरूलाई ऋण बढाउन सहयोग पुग्ने निर्देशन दिएकाले बजार अहिले नै घटेर बियरिस ट्रेन्डमा नआउने विश्लेषण हुँदै आएको छ । 

नेकपा (एमाले)का अध्यक्ष केपी ओली शर्मा नेतृत्वको सरकार बनेपछि बजार ७६०.४० अंकले बजार उकालो लागेर २५१.२४ विन्दुले घटेको छ । ओली नेतृत्वको सरकार असार ३१ गते बनेको थियो । त्यसअघि बजार २२० अंक बढेको थियो ।