काठमाडौँ । मीनभवनमा रहेको निःसहाय सेवा सदनमा तिजको गीत बज्न थालेपछि त्यहाँ रहेका ज्येष्ठ नागरिकहरू कोही फुरफुर गर्न र कोही टोल्हाउन थाले । सधैँ जस्तै बिहानको खाना खाने समय उनीहरूका लागि अन्य दिनभन्दा फरक रहेको थियो । किनभने हालै मात्र हरितालिका तिज पर्वलाई ध्यानमा राखेर सार्वजनिक गरिएको ‘यसपालिको तिज रमाइलो’ गीत बजिरहेको थियो ।

गीतकार निर्मलराज पौडेलले यसपटकको तिजलाई भिन्न ढंगले मनाउने सन्दर्भमा बुधबार उक्त सेवा सदनका ज्येष्ठ नागरिकहरूसँग तिज मनाएका छन् । त्यस अवसरमा पौडेलले ज्येष्ठ नागरिकलाई आफू र गायिका शान्तिश्री परियारको स्वरबद्ध तिज गीत सुनाउँदै दरमा सामेल भएका थिए । ‘चेलीबेटी ज्यान माया माइतमै हाँसेर, तीज आयो ज्यान माया छमछमी नाचेर’ बोलको गीत सुनेर ज्येष्ठ नागरिकहरूको मुहारमा खुसी छचल्किएको थियो ।

त्यस अवसरमा काठमाडौं महानगर–३१ का वडाध्यक्ष सरोज ढकालले पनि ज्येष्ठ नागरिकहरूका लागि वडाले सक्दो सहयोग गरिरहेको बताए । उनले भने, “निःसहाय सेवा सदनले ज्येष्ठ नागरिकहरूलाई आफ्ना परिवारको अभाव हुन दिइरहेको छैन, यो ज्यादै खुसीको कुरा हो र यहाँको व्यवस्थापन निकै लोभलाग्दो छ ।”

सेवा सदनका सह–प्रशासकीय अधिकृत योगेश अधिकारीका अनुसार सदनमा ६५ देखि १०० वर्षसम्मका ३९ जना ज्येष्ठ नागरिक छन् । अधिकारीले भने, “यो अवस्थामा उहाँहरूलाई सबैभन्दा खड्किने कुरा भनेकै परिवार रहेछ । हामीले सक्दो गरिरहेका हुन्छौँ तर पनि नौलो मान्छे र केटाकेटी देख्नेबित्तिकै टोल्हाउने गर्नुहुन्छ । आँखाबाट बरर आँसु झार्नुहुन्छ ।”

गीतकार पौडेलको शब्द र चर्चित गायिका शान्तिश्री परियार र संगीतकार मोहित मुनालको सृजनामा ‘यसपालिको तिज रमाइलो’ नामक गीत केही समयअघि सार्वजनिक भएको थियो ।