काठमाडौं । संस्कृति पर्यटन तथा नागरिक उड्डयनमन्त्री बद्री पाण्डेले पोखरा र भैरहवा अन्तर्राष्ट्रिय विमानस्थल सञ्चालन गर्न सकेको अवस्थामा लाखौँ पर्यटक भित्र्याउन सकिने बताएका छन् । मंगलबार अन्तर्राष्ट्रिय वायु सेवा सञ्चालकहरूसँगको छलफलमा मन्त्री पाण्डे उक्त कुरा बताएका हुन् ।

“देश आर्थिक लगायतका जटिलतामा गुज्रिइरहेको छ । यो संकटको अवस्था हुँदाहुँदै पनि सरकारले विभिन्न प्योकज ल्याएर पोखरा र भैरहवा अन्तर्राष्ट्रिय विमानस्थल सञ्चालन गर्न खोजेको छ,” उनले भने, “देशको जटिलतालाई बुझेर सरकारले गरेको निर्णय कम आक्नु हुँदैन ।”

मन्त्री पाण्डेले दुईवटै विमानस्थल सञ्चालनका लागि नीतिगत, व्यावसायिक र सुरक्षाका क्षेत्रमा निरन्तर छलफल गर्न सरकार तत्पर रहेको बताए । उनले पोखरा पर्यटकीय राजधानी भएको उल्लेख गर्दै चीन, भारत लगायतका मुलुकबाट पोखरा र भैरहवामा पर्यटकहरू भित्र्याउन सकेको अवस्थामा राज्यले लाखौँ राजस्व भित्र्याउन सक्ने बताए ।

उनले सरकारले ल्याएको प्याकेजमा दुई वर्षपछि के होला ? भन्ने विषयमा चिन्ता नलिन समेत अन्तर्राष्ट्रिय विमान कम्पनीहरूसँग विश्वास दिलाए । मन्त्री पाण्डेले रुटका विषयमा सरकार चीन भारतसँग कूटनैतिक रूपमा अघि बढिसकेको समेत बताए ।छलफलमा जजिरा, सिंगापुर एयरलाइन्स लगायतका दर्जन बढी वायु सेवा सञ्चालकहरूको उपस्थिति थियो ।