काठमाडौं । अर्थमन्त्री विष्णुप्रसाद पौडेलले मुलुकको अर्थतन्त्र चलायमान हुँदै गएको बताएका छन् । मंगलबार काठमाडौंको भृकुटीमण्डपमा नाडा अटो शो २०२४ को उद्घाटन गर्दै मन्त्री पाडैलले वर्तमान सरकारले गरेको सहज नीतिगत व्यवस्थाका कारण अर्थतन्त्र चलायमान हुँदै गएको बताएका हुन् । 

नीतिग स्थिरता राजनीतिक स्थिरतासँग जोडिएको भन्दै अहिलेको सरकार स्थिर सरकार भएको उनले बताए । 

उनले व्यवसायीहरूको नीतिगत समस्यालाई समाधान गर्नेगरी सरकार अघि बढ्ने बताए । अब अटो उत्पादनतर्फ ध्यान केन्द्रित हुनुपर्ने र यसमा सरकारले साथ दिने उनको भनाइ छ । 

मन्त्री पौडेलले नेपालमा गुणस्तरीय उत्पादन गर्नसके विदेशी बजारमा पनि नेपालको उत्पादनले स्थान लिनसक्ने जिकिर गरे । 

अर्थमन्त्री पौडेलले विद्युतीय सवारीसाधानका साथै अर्थतन्त्रका सवै क्षेत्रमा अध्ययन र अनुसन्धान गरे निष्कर्षमा पुग्ने र त्यसलाई व्यवहारमा कार्यान्वयन गर्ने बताए । 

उद्योग वाणिज्य महासंघका अध्यक्ष चन्द्रप्रसाद ढकालले अटो मोवाइल्सलाई लक्जरीको रूपमा हेर्दा केही सीमा र संकुचन देखिएको भन्दै यसलाई राज्यले ध्यान दिएर सहजीकरण गर्नुपर्ने बताए । अटो मोवाइल्सलाई प्राथमिकतामा राख्न सके करमा समेत बृद्धि हुने उनको भनाइ छ । 

नाडा अटोमोबाइल एसोसिएसन अफ नेपालले हरेक वर्ष बृहत् अटो शो गर्दै आएको छ । यसपटकको अटो शो भदौ १६ गतेसम्म आयोजना हुने बताइएको छ ।