काठमाडौं । जर्मन लेजेन्ड म्यानुअल नेयुरले अन्तर्राष्ट्रिय फुटबलबाट सन्न्यासको घोषणा गरेका छन् । नेयुरले युरो–२०२४ मा जर्मनीबाट अन्तिमपटक प्रतिस्पर्धा गरेका थिए । 

उनले जर्मनीबाट १२४ खेलपछि सन्न्यासको निर्णय लिएका हुन् । युरो–२०२४ पछि जर्मनीको टिमबाट सन्न्यास लिने नेयुर चौथो खेलाडी हुन् । 

यसअघि युरोपियन च्याम्पियनसिपपछि इल्कार गुन्डोगान, थोमस मुलर र टोनी क्रुसले सन्न्यासको घोषणा गरेका थिए । युरोमा जर्मनीले क्वार्टरफाइनलसम्मको यात्रा तय गरेको थियो । तर, अन्तिम–८ को खेलमा स्पेनसँग पराजित भएपछि जर्मनीको यात्रा टुंगिएको थियो । 

“मलाई बुझ्नेहरुलाई थाहा छ, मेरो लागि यो सहज निर्णय थिएन । सन् २०२३ सम्म राष्ट्रिय टिमको कप्तानी सम्हाल्न पाउँनु मेरो लागि सम्मानको कुरा हो,” सन्न्यास घोषणा गर्दै नेयुरले लेखेका छन् । जर्मनीले सन् २०१४ मा फिफा विश्वकपको उपाधि जित्दा नेयुर प्रतियोगिताकै उत्कृष्ट गोलकिपर घोषित भएका थिए ।