काठमाडौं । देशका धेरैजसो स्थानमा गएरातिदेखि भारी वर्षा भइरहेको छ । कतिपय स्थानमा भारी वर्षा हुँदा अधिकांश क्षेत्रमा हल्कादेखि मध्यम वर्षा हुने जल तथा मौसम विज्ञान विभागले जनाएको छ । 

सुदूरपश्चिम प्रदेशमा आज अन्य प्रदेशको तुलनामा धेरै वर्षा भएको छ । “कैलालीलगायत सुदूरपश्चिमका केही स्थानमा गएरातिदेखि नै भारी वर्षा भइरहेको छ,” मौसमविद् विनु महर्जन बाह्रखरीसँग भन्छिन्, “कैलाली र सुदूरपश्चिम प्रदेशका भारी वर्षा भएका स्थानमा एक सय मिलिमिटरभन्दा धेरै वर्षा भएको छ ।” 

सुदूरपश्चिम प्रदेशमा न्यूनचापीय रेखासँगै न्यून चापीय क्षेत्र पनि विकास भएकाले अन्य प्रदेशमाभन्दा धेरै वर्षा भएको उनको भनाइ छ । “न्यूनचापीय क्षेत्र सक्रिय हुँदा यसै पनि भारी वर्षाको सम्भावना हुन्छ, त्यससँगै न्यून चापीय क्षेत्र पनि विकास हुँदा धेरै वर्षा भएको हो,” मौसमविद् महर्जनले स्पष्ट पारिन् । 

उनका अनुसार मधेस प्रदेशका बारालगायत केही स्थानमा मात्रै वर्षा भएको छ । कोसीको पश्चिमी भू–भागमा कम वर्षा भइरहेको छ । बाँकी सबै प्रदेशका अधिकांश स्थानमा वर्षा भइरहेको छ । यो क्रमले अझै केही समय निरन्तरता पाउने उनको भनाइ छ । 

वाग्मती, गण्डकी र लुम्बिनीका केही थानमा पनि भारी वर्षा भएको छ । काठमाडौंमा पनि भारी वर्षा भएको छ । गएरातिदेखि सुरु भएको वर्षा दिउँसो ३ बज्दासम्म रोकिएको छैन । काठमाडौंमा पनि भारी वर्षा भएको छ । जसका कारण वाग्मती, विष्णुमती, धोवी खोलालगायत काठमाडौंका अधिकांश नदी तथा खोलामा जलसतह बढेको छ । 

जल तथा मौसम विज्ञान विभागले बिहान गौरीघाटस्थित जलमापन केन्द्रमा वाग्मतीमा जलसतहले सतर्कता तह पार गरेको जनाएको थियो । 

“मनसुनको न्यूनचापीय रेखा सरदर स्थानको केही उत्तरतर्फ रहेका कारण देशका धेरै स्थानमा वर्षा भइरहेको हो । न्यूनचापीय रेखा सरदर स्थानबाट उत्तरतर्फ सर्दा मनसुन थप सक्रिय भएर भारी वर्षा हुन्छ,” मौसमविद् महर्जन भन्छिन्, “यो रेखा आज राति केही दक्षिणतर्फ सरे पनि पुनः उत्तरतर्फ नै सर्नेछ । त्यसैले आज जस्तै भोलि पनि पानी पर्नेछ ।” 

आज र भोलि पानी परे पनि शुक्रबारबाट भने केही कम हुने उनले जानकारी दिइन् । “आज र भोलिको तुलनामा शुक्रबार न्यूनचापीय रेखा सरदर स्थानबाट केही दक्षिणतर्फ सर्नेछ, जसका कारण वर्षा केही कम हुनेछ ।” 

यद्यपि, अति भारी र धेरै भारी वर्षा नभए पनि भारी वर्षाको सम्भावना भने केही प्रदेशमा रहिरहने उनी स्पष्ट पार्छिन् । “यो वर्ष मनसुन सक्रिय भएपछि कुनै न कुनै प्रदेशमा भारी वर्षा भइरहेको छ,” मौसमविद् महर्जन भन्छिन्, “यसले निरन्तरता पाउनेछ ।” 

आज राति कर्णाली, गण्डकी र लुम्बिनी प्रदेशमा भारी वर्षाको सम्भावना छ । 

बिहीबार दिउँसो कोसी, लुम्बिनी र मधेस प्रदेशका थोरै स्थानमा तथा बाँकी प्रदेशका एकदुई स्थानमा भारी वर्षाको सम्भावना रहेको छ । राति कोसी, वाग्मती, गण्डकी र लुम्बिनी प्रदेशका एकदुई स्थानमा भारी वर्षाको सम्भावना रहेको विभागले जनाएको छ ।

विभागका अनुसार शुक्रबार दिउँसो कोसी, लुम्बिनी, कर्णाली र सुदूरपश्चिम प्रदेशका एकदुई स्थानमा भारी वर्षाको सम्भावना छ । राति कोसी, मधेस र लुम्बिनी प्रदेशका एक–दुई स्थानमा भारी वर्षाको सम्भावना छ ।