काठमाडौं । प्रधानसेनापति प्रभुराम शर्माले शुक्रबारबाट कायममुकायम प्रधानसेनापतिको जिम्मेवारी पाउने बलाधिकृत रथी अशोकराज सिग्देललाई प्रधानसेनापतिको कार्यभार बुझबुझारथ गरेका छन् । 

प्रधानसेनापति शर्मा शुक्रबारबाट बिदामा बस्ने भएपछि बिहीबार बुझबुझारथ गरिएको नेपाली सेनाको जनसम्पर्क तथा सूचना निर्देशनालयले जनाएको छ । 

नेपाली सेनामा प्रधानसेनापतिले अवकाश पाउनु एक महिनाअघिबाट बिदा बस्ने अभ्यास रहीआएको छ । प्रधानसेनापति शर्माले आगामी भदौ २४ गतेबाट पदावधिको हदले नेपाली सेनाबाट अनिवार्य अवकाश प्राप्त गर्दै छन् । सहायक सेनानी दर्जामा नेपाली सेनामा प्रवेश गरेका प्रधानसेनापति शर्माले करिब ४१ वर्ष सेनामा बिताएका छन् । 

बुझबुझारथ कार्यक्रममा प्रधानसेनापति शर्माले सेनाको सबै तह र तप्काहरूलाई राम्रोसँग बुझेको, नीति नियम र पद्धतिबारे गहन बुझाइ राख्ने, व्यावहारिक एवम् उत्कृष्ट व्यावसायिक क्षमता भएका सिग्देललाई आफ्नो उत्तराधिकारीका रूपमा कार्यभार बुझाउन पाएकोमा खुसी व्यक्त गरेका थिए । 

प्रधानसेनापति शर्माले सिग्देललाई सफल कार्यकालका लागि शुभकामनासहित बधाई समेत दिएका थिए । 

कार्यक्रममा नेपाली सेनाका पूर्वप्रधानसेनापतिहरू, रक्षा सचिवलगायत रथी, रक्षा मन्त्रालयका पदाधिकारी, अधिकृत, पदीक तथा सकलदर्जाको उपस्थिति रहेको थियो ।