काठमाडौं । विपद्का घटनामा परी आज देशका विभिन्न जिल्लामा ११ जनाको मृत्युभएको छ । योसँगै अविरल वर्षाका कारण गत जेठ २८ गतेदेखि देशका विभिन्न स्थानमा आएको बाढी, पहिरोलगायतका विपद्‌मा परी हालसम्म १६५ जनाको मृत्यु भएको छ ।

आज बागलुङ र गुल्मीमा बढी मानवीय क्षति भएको प्रहरी प्रवक्ता प्रहरी नायब महानिरीक्षक दानबाहादुर कार्कीले जानकारी दिए ।

बाढी, पहिरोलगायतका विपद्‌मा परी काठमाडौं उपत्यकामा तीन, कोसीमा २५, मधेस प्रदेशमा छ, वाग्मतीमा ३०, गण्डकीमा ५०, लुम्बिनीमा ३३, कर्णाली प्रदेशमा आठ र सुदूरपश्चिम प्रदेशमा १० जनाको मृत्यु भएको प्रहरीले जनाएको छ । 

विपद्‌मा परी आजसम्म १९८ जना घाइते भएका छन् भने १५१ जना बेपत्ता भएका छन् । प्रहरी प्रवक्ता कार्कीले आजमात्रै थप चार जना बेपत्ता भएका जानकारी दिए ।