वासिङटन । अमेरिकाको रिपब्लिकन पार्टीले पूर्वराष्ट्रपति डोनाल्ड ट्रम्पलाई औपचारिक रूपमा आउँदो कार्यकालको राष्ट्रपति पदको उमेदवारका रूपमा अनुमोदन गरेको छ । बिहीबार (नेपाली समयानुसार शुक्रबार बिहान) पार्टीले ट्रम्पलाई अनुमोदन गरेको हो ।

उनले त्यसलाई स्वीकार गर्दै सबै अमेरिकीलाई एक हुन बैठकमार्फत आग्रह गरे । गएको शनिबार आफ्नो हत्या प्रयास गरिएपछि उनले सार्वजनिक रूपमा पार्टीको बैठकमा पहिलोपटक मन्तव्य दिएका हुन् ।

शनिबार पेन्सिलभानियामा उनको हत्या प्रयास गरिएको थियो । उनले त्यो दिन आफ्नो शरीरभरि रगत चुहिएको बताए । आफ्नो पक्षमा भगवान् रहेको उनको भनाइ थियो ।

आफूले त्यो दिन टाउको नचलाएको भए रिपब्लिकन पार्टीको समारोहमा आउन नपाउने अवस्था हुने समेत उनले बताए । “सायद म आजको रात यहाँ हुने थिइनँ,” उनले भने, “म तपाईँहरूको अगाडि उभिन पाएको भगवान्‌को कृपाले मात्र हो ।”

ट्रम्पले शनिबारको र्‍यालीमा मृत्यु भएका व्यक्तिप्रति श्रद्धाञ्जली पनि व्यक्त गरे ।

राजनीतिक कार्यक्रममा कमै मात्र उपस्थित हुने ट्रम्पपत्नी मेलानिया पनि त्यहाँ पुगेकी थिइन् । बीबीसीबाट ।